L-aħħar rapport maħruġ mill-Kummissjoni Ewropea dwar xejriet ta’ eGovernment fost is-27 stat membru, juri li s-servizz pubbliku Malti qed jikseb l-aqwa riżultati f’dan il-qasam. Dan juri li l-Gvern Malti qed jagħmel użu tajjeb mit-teknoloġija diġitali li permezz tagħha, il-pubbliku inġenerali li jkollu bżonn servizz mill-istat, qed ikun moqdi aktar malajr u b’effiċjenza akbar.
Dan l-iżvilupp ma ġiex waħdu imma kien jeħtieġ inizjattivi, riċerka, fondi u soluzzjonijiet. Fatt interessanti huwa dak li fil-Budget 2026, li tħabbar fis-27 t’Ottubru li għadda, il-Gvern qed jirrikonoxxi l-importanza tad-diġitalizzazzjoni tal-ekonomija tant li fih tħabbret nefqa ta’ mhux inqas minn €100 miljun fit-tħaddim tal-Intelliġenza Artifiċjali. Dan b’għan speċifiku biex anke n-negozji jibbenefikaw minn dawn l-opportunitajiet.
Kumparat ma’ pajjiżi oħra Ewropej, pajjiżna f’dan il-qasam miexi b’ritmu mgħaġġel ħafna u qed jeċċella b’mod fejn pajjiżi oħra ma jistgħux ilaħħqu magħna f’dan is-settur. Dan minħabba politika ta’ awsterità li adottaw sforz il-piżijiet kbar u l-isfidi li qed jaffaċċjaw l-ekonomiji tagħhom. Prova ta’ dan huwa l-aħħar budget fir-Renju Unit fejn il-Gvern, minflok qed jinvesti sostanzjalment fit-teknoloġija, irid jiġbor madwar 26 biljun lira sterlina oħra biex itaffi mid-dejn u l-iżbilanċ finanzjarju li qed jaffaċċja.
Malta m’għandniex dis-sitwazzjoni. U kif jindika r-rapport tal-Kummissjoni Ewropea, Malta qed tikseb ukoll punteġġi massimi f’oqsma diġitali ġenerali bħalma hu l-appoġġ li jingħata liċ-ċittadini online meta jużaw servizzi diġitali governattivi. Dan is-settur huwa b’saħħtu u adegwat. Dan ukoll jixhed it-trasparenza dwar kemm dawn is-servizzi diġitali governattivi huma ddisinjati bl-involviment taċ-ċittadini u kemm jingħataw b’metodi informattivi u trasparenti.
Riżultati bħal dawn jikkonfermaw kemm is-servizz pubbliku mexa ’l quddiem u kemm għad għandu opportunitajiet quddiemu biex javvanza aktar fil-qasam tal-eGovernment. Jindika wkoll kemm l-uffiċjali Maltin fis-Servizz Pubbliku huma dedikati biex iwasslu servizzi diġitali tal-ogħla livell fejn iċ-ċittadini qed ikollhom ċans jaċċessaw is-servizzi mogħtija mill-Gvern bl-akbar faċilità.
Dan huwa kkonfermat ukoll mill-Prim Ministru Robert Abela, li stqarr li Malta qed tkompli teċċella fil-governanza diġitali madwar l-Ewropa u li s-Servizz Pubbliku huwa l-forza tal-bidla pożittiva f’pajjiżna.
