Meta f’nofs is-snin 90 l-istil mużikali Eurodance laqat lill-Ewropa b’saħħa liema bħalha isem sinonimu magħha hi l-vuċi qawwija ta’ Regina Aparecida “Queen” Saraiva.
Illum, aktar minn 25 sena wara s-suċċess li għamlilha isimha internazzjonali, din il-kantanta Brażiljana għadha titla’ fuq diversi palkijiet prestiġġjużi. Fil-fatt fi tmiem din il-ġimgħa, Regina kienet preżenti fiż-Zurrieq Summer Fest, festa tal-mużika u solidarjetà u għajnuna għal Dar Bjorn. Dan is-sit ħadet il-kummenti ta’ Regina wara dan il-festival li tant kellu konkorrenza, ftit jiem qabel il-festa ta’ Santa Katerina fiż-Żurrieq stess.
“Jien ninsab kuntenta ħafna li ninsab lura Malta. Mhux l-ewwel darba, fil-fatt diġà ġejt fis-snin 90 u anke fis-snin 2000. Malta nħobbha wisq … dejjem kelli esperjenza sabiħa f’dan il-pajjiż, u fil-fatt kont qed inħares ‘il quddiem biex niltaqa’ mal-Maltin fiż-Zurrieq,” qaltilna bi tbissima. Il-preżenza tagħha fuq il-line-up ta’ dan l-avveniment kien wieħed mill-aktar attrazzjonijiet tal-festival: vuċi li għadha friska fil-memorja ta’ ħafna.
Regina twieldet fl-1 ta’ Settembru 1968 f’Sorocaba, São Paulo, il-Brażil. It-tfulija tagħha kienet imdawra bil-mużika u mill-enerġija ta’ kultura vibranti. Bejn l-1989 u l-1995 kienet il-vuċi wara l-grupp Forbidden Fruit, trio Brażiljan ta’ dance-pop li bih bdiet tagħmel isem f’pajjiżha.
Imbagħad ġie l-pass il-kbir: il-migrazzjoni lejn l-Italja. Hawnhekk ħadet identità artistika ġdida – Regina, Queen Regina, jew Jean Jane – u bdiet tħalli impatt fuq ix-xena tal-Eurodance li kienet qed tbaqbaq fis-snin 90.
Fl-1996, Regina ħarġet verżjoni dance tal-kanzunetta “Killing Me Softly”. Din laqtet sew il-klabbs Taljani u fetħilha l-bieb għal aktar opportunitajiet. Imma kienet sena wara, fl-1997, li verament spiċċat f’nofs il-mejda Ewropea.
B’ritmu irresistibbli u vuċi li tħossok titgħallem minnha, “Day by Day” malajr saret stabbilita fil-klabbs tad-divertiment u diskoteki ewlenin mhux biss fl-Ewropa iżda wkoll fid-dinja. Hija ħarġet fuq Nitelite Records u spiċċat inkluża fl-album tagħha Situations (1998). Il-kanzunetta laħqet in-numru 8 fl-Italja, il-pożizzjoni numru 11 fuq il-Billboard Hot Dance/Club Play fl-Istati Uniti u anke daħlet fil-klassifika tar-Renju Unit.
Kurżità interessanti kienet li dak iż-żmien il-Billboard żbalja meta attribwixxa l-kanzunetta lil Regina Amerikana oħra li kienet diġà rtirat. Imma għal dawk li kienu fil-klabb, kien ċar min kienet il-vuċi vera – dik ta’ Regina Saraiva.
“‘Day by Day’ għadha speċjali għalija. Dejjem ngħid li kienet sorpriża kbira, għax ma kontx nistenna li tasal daqshekk. Sa llum, in-nies għadhom jiġuni jitkellmu fuqu u jitolbuha fil-kunċerti. Anke fiż-Żurrieq kantajtha u tista’ taħseb kif qabżu, żifnu u kantaw in-nies għaliha.”
L-album Situations ma kienx biss dwar il-kanzunetta waħda. Ġab magħha tracks oħra bħal “Stranger in Paradise”, “Close the Door” u “What Can You Do”. Aktar tard, bejn l-2000 u l-2002, ħarġet ukoll “You and Me”, “You Don’t Fool Me”, “Secret Mission” u “I’m Back”.
Anke wara li l-Era tad-Eurodance kienet bdiet tonqos, hi baqgħet tipprova u żammet ir-rabta tagħha mal-mużika: “Up / You and I” (2007), “Time Shine” (2011), “Imaginaçao” (2013), “The Girl from Ipanema” (2014) u “Ibiza Vibe” (2016).
Meta tkellimna fuq kif qed tinbidel ix-xena mużikali, Regina kienet ċara ħafna:
“Il-wasla tal-internet biddel kollox. Bejn l-2001 u l-2004 rajt kif l-industrija nbidlet kompletament, minn kif noħorġu l-kanzunetti, sal-mod kif in-nies jisimgħu l-mużika. Illum għandek streaming, għandek YouTube… mhux bħalma kien qabel konna nużaw il-music cassettes u aktar tard is-CDs.”
U fi żmien meta ħafna kantanti qed jitilfu l-pass, hi anzi sabet spazju ġdid. Fil-fatt hi ilha taħdem għal dawn l-aħħar għaxar snin f’radju fl-Italja, fejn kompliet iżżomm il-pass mal-mużika l-ġdida u tibqa’ qrib il-pubbliku tagħha.
Illum, Regina tgħix f’Milan, l-Italja. Ma qagħditx lura mill-palk: anzi, hi parteċipi wkoll fi gospel choir li deher fuq il-programm televiżiv Markette ta’ Piero Chiambretti fuq La7.
Din l-esperjenza ġabet tagħha – elementi vokali differenti, aktar spiritwali, imma dejjem b’dik il-passjoni li tagħmilha unika.
Fl-aħħar parti tal-intervista tagħna, staqsejtha x’messaġġ tixtieq tħalli. Hija wieġbet b’mod ċar ħafna:
“Il-mużika hi importanti. Il-mużika hi l-ħajja. Jiena nemmen fil-mużika u kull min iħobb il-mużika għandu jkompli jemmen fiha wkoll.”
Regina Saraiva ddeskriviet il-lejla fiż-Zurrieq bħala waħda ta’ solidarjetà, enerġija u memorji li jġibu lura ż-żmien tad-disco lights u l-Eurodance fuq il-clubs Ewropej.
Minn Sorocaba sal-palkijiet ta’ Milan u riċentement fiż-Żurrieq, il-vjaġġ ta’ Regina huwa xhieda ta’ kemm il-mużika tista’ tagħtik ħajja sħiħa. “Day by Day” għadha tinxtered fil-memorja ta’ ħafna, imma hi stess tgħidlek: mhux biss dik il-kanzunetta, imma l-istorja kollha tagħha hi prova li l-mużika tgħaqqad, tfarraġ u tispira.