Minn Cristian Muscat
Meta llum u għada tintlagħab l-14-il ġurnata tal-Ewwel Fażi tal-Malta Premier, l-attenzjoni prinċipali tkun immirata fuq il-partita bejn il- leaders Birkirkara u Sliema Wanderers li jinsabu fit-tielet post tal-klassifika tat-Top Six.
Min-naħa l-oħra, Floriana, li jinsabu fit-tieni post, jilagħbu kontra Hamrun Spartans li prattikament qed jutilizzaw u jippreparaw lill-players żgħażagħ tagħhom għat-tieni fażi.
Il-partita bejn Hibernians u Mosta hija formalitá minħabba li filwaqt li l-Mostin jinsabu fl-aħħar post, il-Pawlisti ma għandhom l-ebda ċans li jirbħu din il-fażi meta jinsabu 10 punti taħt Birkirkara meta fadal tliet logħbiet għat- tmiem.
Mill-kategorija tal-Bottom Six, Gzira United jiffaċċjaw lil Marsaxlokk hekk kif iż-żewġ timijiet jinsabu jaqsmu l-ewwel pożizzjoni.
Naxxar Lions jimmiraw li jitilgħu aktar ‘il fuq fil- klassifika meta jiltaqgħu kontra t-team li jinsabu fil-qiegħ tal-klassifika, Zabbar St Patrick.
Balzan jimmiraw li jinqalgħu miż-żona tar-relegazzjoni meta jilagħbu kontra Melita li jinsabu tliet punti biss fuqhom.
Birkirkara v Sliema W. – Bla dubju, din hija l-aqwa partita ta’ tmiem il-ġimgħa fejn Sliema Wanderers għandhom l-aħħar ċans biex jibqgħu jisfidaw ħalli jirbħu din il-fażi.
Għaldaqstant xejn għajr minn rebħa ma tissodisfa l-kriterji tagħhom fit-tentattiv li jnaqqsu d-distakk għal żewġ punti minn Birkirkara. Barra minn hekk, il-Wanderers jittamaw li Floriana jiżolqu kontra Hamrun Spartans.
Rebħa għal Birkirkara tkun tfisser li jaqtgħu lill-Blues bi tmien punti.
Filwaqt li l-Istripes ġejjin minn rebħa ta’ 2-0 fuq Mosta, huma se jkunu msaħħa bl-akkwist il-ġdid tal-attakkant mill-Ghana, Seth Paintsil, li sal-istaġun li għadda lagħab ma’ Hamrun Spartans.
Aktar minn hekk, se jirritorna wkoll l-aqwa skorer tal-kampjonat s’issa, il-Brażiljan Maxuell Maia minn sospensjoni.
Fl-ewwel round huma kienu għelbu lil Sliema bl-iskor ta’ 1-0.
Floriana v Hamrun S. – Floriana għandhom partita diffiċli kontra Hamrun Spartans u jridu jkunu fl- aqwa forma tagħhom jekk iridu jiksbu t-tliet punti biex jibqgħu jżommu l- kuntatt ma’ Birkirkara u jibqgħu biċ-ċans biex jispiċċaw fl-ewwel post.
Il-Greens jinżlu għal dan il-konfront b’moral għoli hekk kif ġejjin minn tliet rebħiet konsekuttivi filwaqt li huma l-uniku team li għadu ma ġiex megħlub.
Min-naħa tagħhom, l-Ispartans qed jużaw dawn il-logħbiet bħala preludju għaż-żgħażagħ tagħhom għat-Tieni Fażi hekk kif kollox jerġa’ jibda minn zero.
Iż-żewġ timijiet se jinżlu bl-aqwa formazzjoni possibbli.
Huma spiċċaw fi draw ta’ 1-1 fl-ewwel round.
Hibernians v Mosta – Din hija partita bejn żewġ timijiet li ġejjin minn telfa identika ta’ 2-0 … Hibernians kontra Floriana u Mosta kontra Birkirkara.
Fil-veritá, din hija logħba mingħajr l-ebda interess u għaldaqstant wieħed jistenna li ż-żewġ coaches rispettivi jagħmlu bosta bidliet mill-aħħar ħarġa tagħhom biex jutilizzaw il-players żgħażagħ biex fl-istess waqt jagħtuhom aktar esperjenza fl-ogħla diviżjoni.
Filwaqt li Mosta ma għandhomx problemi ta’ players neqsin, Hibernians għandhom lill-goalkeeper, Hugo Sacco, u lil Pedro Henrique Silva sospiżi iżda jirritorna Khevin Rodrigo Fraga minn sospensjoni.
Fil-partita preċedenti, Mosta għelbu lil Hibernians bl-iskor ta’ 1-0.
Gzira U. v Marsaxlokk – Din hija partita bejn żewġ timijiet li għandhom l-istess objettiv … li jtemmu fil-quċċata tal-Bottom Six … hekk kif Gzira United u Marsaxlokk qed jokkupaw flimkien il-quċċata ta’ din il-kategorija.
Fl-aħħar ħarġa, ix-Xlukkajri għelbu lil Melita bl-iskor ta’ 3-1 biex approfittaw miż-żelqa tal-Gżirjani hekk kif ġew miżuma fi draw ta’ 1-1 minn Naxxar Lions.
Marsaxlokk se jkunu mingħajr il-captain, Ryan Scicluna, li huwa sospiż wara li rċieva r-raba’ karta safra fl-aħħar partita.
Fil-partita preċedenti, Gzira għelbu lil Marsaxlokk bl-iskor ta’ 1-0.
Naxxar L. v Zabbar SP – Ispirati mir-rebħa ta’ 2-1 fuq Balzan wara seba’ telfiet konsekuttivi, Zabbar St Patrick jimmiraw li jkomplu jibnu fuq dan is-suċċess meta jisfidaw lil Naxxar Lions fit-tenattiv li ma jispiċċawx din il-fażi fl-aħħar post.
Iżda huma għandhom lil Vinicius de Paiva sospiż.
Fl-ewwel konfront dirett ta’ bejniethom iż-żewġ timijiet spiċċaw fi draw ta’ 3-3.
Melita v Balzan – Din il-partita tkun l-aħħar waħda tal-programm hekk kif Balzan ifittxu l-ewwel rebħa f’seba’ partiti.
Huma se jkunu msaħħa bir-ritorn minn sospensjoni tat-tliet players, Nicholas Pulis, Kevin Williams u Oluwatobiloba Dimeji Awosanya filwaqt li Melita għandhom lil Gareth Barone sospiż.
– Cristian Muscat
Melita v Naxxar L. – xxx
– Cristian Muscat
