Minn Cristian Muscat
Bejn illum u għada tintlagħab ir-raba’ ġurnata tal-Malta Premier League, bl-aktar partita attraenti tkun dik bejn ir-rivali eterni, Floriana u Valletta.
Hija ħasra li partita ta’ din ix-xorta tintlagħab matul il-ġimgħa filgħaxija minħabba li l-attendenza kienet tkun akbar li kieku ntlagħbet fi tmiem il-ġimgħa.
Partita oħra interessanti hija dik bejn Sliema Wanderers u Birkirkara filwaqt li Hamrun Spartans jiffaċċjaw lil Zabbar St Patrick.
Hibernians, li qed jaqsmu l-ewwel post ma’ Floriana, jiltaqgħu kontra Mosta filwaqt li f’partita bilanċjata Marsaxlokk jilagħbu kontra Gzira United.
Konfront bejn iż-żewġ timijiet tal-qiegħ tal-klassifika, ilaqqa’ lil Naxxar Lions u Tarxien Rainbows.
Floriana v Valletta – Bla dubju, din il-partita tkun l-aktar mistennija matul l- istaġun kollu.
Dan minħabba r-rivalitá li teżisti bejn iż-żewġ lokalitajiet ġirien ta’ xulxin.
Minkejja li Floriana jinsabu fil-quċċata tal-klassifika, il-logħob ta’ Valletta kien aktar konvinċenti u għaldaqstant wieħed jistenna konfront offensiv hekk kif iż-żewġ timijiet joħorġu biex ifittxu l-ewwel goal li jista’ jikkundizzjoni l-andament tal-partita.
Filwaqt li l-Greens ġejjin minn draw ta’ 1-1 kontra Gzira United, il-Lilywhites ġejjin minn rebħa ta’ 3-1 fuq Marsaxlokk li mmaturat fit-tieni taqsima.
Din hija meqjusa partita bilanċjata fejn l-iċken żball jista’ jkun detrimentali.
L-aħħar darba li dawn iż-żewġ timijiet ltaqgħu kien fis-6 ta’ April, 2024, bil-Furjaniżi joħorġu rebbieħa bl-iskor ta’ 2-0.
Sliema W. v Birkirkara – Sliema Wanderers jiltaqgħu kontra Birkirkara li se jkunu mmexxija għall-ewwel darba mill-coach Taljan, Gianluca Festa, li fil- karriera tiegħu lagħab ma’ Inter fost timijiet oħra.
Huwa se jibda b’impenn diffiċli li jrid idawwar il-fortuni tal-Karkariż hekk kif minn tliet partiti għandhom biss żewġ punti … bl-aħħar ħarġa tagħhom tkun it-telfa ta’ 2-1 kontra Hibernians.
Xejn għajr minn rebħa ma tissodisfa l-kriterji tagħhom jekk iridu jibqgħu jżommu l-kuntatt mat-timijiet ta’ fuq.
Rebħa għal Sliema tkun tfisser li jkomplu jsaħħu posthom fin-naħa ta’ fuq tal-klassifika.
Zabbar SP v Hamrun S. – Hamrun Spartans jibdew favorti netti li joħorġu bit-tliet punti hekk kif wara bidu kajman, bħal donnhom qabdu r-ritmu.
Huma ġejjin minn rebħa ta’ 2-0 fuq Mosta wara żewġ draws.
Mosta v Hibernians – Din hija partita delikata għal Hibernians meta jiffaċċjaw lil Mosta li ġejjin minn rebħa u żewġ telfiet.
Fil-veritá, il-Mostin kien jimmeritahom aħjar u għaldaqstant ma tkun l-ebda sorpriża jekk “jisirqu” xi punti minn dan il-konfront.
Iżda Hibernians dejjem jibqgħu ostaklu diffiċli u jinżlu b’moral għoli wara li ġejjin minn rebħa ta’ 2-1 fuq Birkirkara wara li kienu l-Istripes li fetħu l-iskor.
Marsaxlokk v Gzira U. – Wara t-telfa diżappuntanti bl-iskor ta’ 3-1 kontra Valletta, Marsaxlokk jilagħbu kontra Gzira United li ġejjin minn draw ta’ 1-1 kontra Floriana liema konfront setgħu rebħu fil-ħin miżjud iżda Federico Silva Virgens, waħdu quddiem il-goalkeeper Furjaniż, ixxuttja ċentrali biex dan iċ-ċans tad-deheb intilef.
Min-naħa tax-Xlukkajri, iridu jagħrfu kif jirrijorganizzaw lilhom infushom biex iżommu l-pass u jibqgħu jisfidaw fin-naħa ta’ fuq tal-klassifika.
Naxxar L. v Tarxien R. – Din hija partita bejn iż-żewġ timijiet li qed jokkupaw l-aħħar postijiet tal-klassifika, b’punt kull wieħed.
Filwaqt li n-Naxxarin ġejjin minn draw ta’ 1-1 kontra Zabbar St Patrick, it-Tarxiniżi ġejjin minn telfa ta’ 1-0 kontra Sliema.
Rebħa hija vitali għaż-żewġ timijiet fit-tentattiv li jkomplu jissieltu kontra r- relegazzjoni.
