minn Cristian Muscat
Meta llum u għada tintlagħab is-16-il ġurnata li hija wkoll l-aħħar waħda tal-Ewwel Fażi, bla dubju, li l-aktar partita attraenti hija dik bejn Birkirkara u Floriana li qed jokkupaw l-ewwel post.
Dan huwa konfront għal min jirbaħ din il-fażi u jibbukkja postu fil-finali ta’ dik deċiżiva għar-rebħ tat- titlu fi tmiem l-istaġun, jiġifieri, f’Mejju li ġej.
Minn Jannar li ġej tibda tintlagħab it-Tieni Fażi li fiha kull team jibda minn żero punti u jerġa’ jinbeda l-proċess mill-bidu … l-istess bħall-Ewwel Fażi.
Partita oħra interessanti hija din bejn Hibernians u Hamrun Spartans, bil- Pawlisti huma fil-bżonn tal-punti biex jippożizzjonaw lilhom infushom għall-kwalifikazzjoni fil- UEFA Europa League.
It-tielet partita mit-Top Six tkun dik bejn Sliema Wanderers u Mosta hekk kif il-Wanderers jimmiraw għal rebħa biex huma wkoll jidħlu fil-play-offs għall-kompetizzjonijiet Ewropej.
It-tliet partiti mill-Bottox Six se jintlagħbu kollha għada fl-istess ħin minħabba li se jinfluwenzaw il-qagħda tar-relegazzjoni.
Il-leaders Gzira United jilagħbu kontra Melita li jinsabu fit-tielet post u għaldaqstant jimmiraw li jirbħu minħabba li jistgħu jintlaħqu minn Zabbar St Patrick u Naxxar Lions.
Balzan u Naxxar Lions hija logħba diretta bejn iż-żewġ timijiet li jinsabu fl-aħħar żewġ postijiet tal-klassifika.
Birkirkara v Floriana – Kollox jinsab lest biex iż-żewġ settijiet ta’ partitarji ta’ Bikirkara u Floriana jimlew in-naħa tagħhom minħabba li ż-żewġ timijiet se jkunu nvoluti f’partita kruċjali għal min se jiġi nkurunat champions tax- xitwa.
Fil-veritá, xejn għajr minn rebħa ma tissodisfa l- kriterji ta’ Birkirkara biex itemmu din il-fażi fil- quċċata. Dan minħabba li riżultat ta’ draw jkun favur Floriana li fl-ewwel round kienu għelbu lill-istess Karkariżi bl-iskor ta’ 3-1 u għaldaqstant tgħodd ir-regola tal-konfronti diretti.
Filwaqt li Birkirkara ġejjin minn telfa ta’ 1-0 kontra Hibernians, fl-aħħar ħarġa tagħhom, Floriana għelbu lil Sliema Wanderers bl-iskor ta’ 1-0.
Iż-żewġ timijiet għandhom player sospiż – Alessandro Coppola għal Birkirkara u Fernandinho għal Floriana.
Peró, il-Karkariżi jkunu msaħħa minn Alexander Satariano u Maxuell Maia li jirritornaw minn sospensjoni.
Min-naħa l-oħra, Guy Yameogo jirritorna minn sospensjoni għal Floriana iżda għandhom lil Alexandros Kouro mweġġa’.
Sliema W. v Mosta – Wara r-rebħa ta’ 2-1 fuq Hamrun Spartans li biha kisbu double fuq iċ-champions renjanti, Mosta jaffrontaw lil Sliema Wanderers b’moral mill-aktar għoli wara li wettqu din il-bravura.
Min-naħa tagħhom, il- Wanderers ġejjin minn telfa kontra r-rivali eterni, Floriana, u għaldaqstant jimmiraw li jirritornaw għar-rebħ.
Iżda biex jagħmlu dan iridu juru rispett massimu lill-Mostin li “sikktu” għal kollox lill-Ħamruniżi.
Il-Wanderers se jkunu msaħħa bir-ritorn tad-difensur Brażiljan, Murilo Henrique Freire Bernardo u Mosta jilqgħu lil Clayton Failla, meta t-tnejn ġejjin minn sospensjoni.
Fl-ewwel round, Sliema ħarġu rebbieħa bl-iskor ta’ 2-0.
Hibernians v Hamrun S. – Din għandha tkun partita bilanċjata u inċerta bejn żewġ timijiet li fl-aħħar ħarġa kellhom riżultat differenti.
Filwaqt li l-Pawlisti ssuperaw lil Birkirkara (2-0), il-Ħamruniżi sfaw megħluba minn Mosta (2-1).
Barra minn hekk, Hibs huma fil-bżonn tal-punti aktar mill-Ispartans biex jibqgħu jisfidaw għall-kwalifikazzjoni f’kompetizzjoni Ewropea.
Għal Hibernians, Bjorn Kristensen u Gianni Bastianos se jirritornaw minn sospensjoni filwaqt li l-Ispartans għandhom lit-tliet players – Luke Montebello, Elionay Freitas u Rapahel Lopes Silva, sospiżi. Iżda jirritornaw Joseph Mbong u Mayron Marques Barbosa.
Fl-ewwel round, Hibs għelbu lil Hamrun bl-iskor ta’ 2-0.
Gzira U. v Melita – Gzira United jiltaqgħu ma’ Melita. Rebħa għalihom tkun tfisser li jtemmu fl-ewwel post tal-Bottom Six iżda b’telfa jkunu jistgħu jinqabżu minn Marsaxlokk.
Il-Maroons ma jistgħux jinkludu lis-sospiżi, Zachary Scerri u Marcelo Dias, iżda jirritornaw Enrico Pepe u Brooklyn Borg filwaqt li Melita għandhom lil Aldair Simanca Pena sospiż.
Fl-ewwel round, il-Ġżirjani ħarġu rebbieħa 3-2.
Balzan v Naxxar L. – Din hija partita bejn it-timijiet li qed jokkupaw l-aħħar żewġ postijiet.
Filwaqt li Balzan se jinżlu bl-aqwa formazzjoni possibbli, Naxxar Lions għandhom lil Fernando Barbosa Pereira sospiż iżda jirritornaw Edson Cerqueira Farias u Nikolai Micallef minn sospensjoni.
Marsaxlokk v Zabbar SP – Zabbar St Patrick jimmiraw li jinsew it-telfa tal- ewwel round bl-iskor ta’ 3-1 kontra Marsaxlokk u jirreġistraw ir-raba’ rebħa konsekuttiva wara li għelbu lil Balzan (2-1), Naxxar L. (3-0) u Melita (1-0).
