Bejn illum u għada tintlagħab l-10 ġurnata tal-Closing Round li hija kruċjali minħabba li hija wkoll ta’ qabel l-aħħar biex jiġi deċiż min se jilgħab fit-Top Six u fil-Bottom Six bit-taqtiegħa hija ferm interessanti u għaldaqstant xejn għajr minn rebħa ma tissodisfa l-kriterji ta’ dawk it-timijiet involuti.
Iżda l-isfida għall-ewwel post tkompli bejn Floriana, Hamrun Spartans u sa ċertu punt Marsaxlokk li jinsabu fit-tielet post tal-klassifika.
It-tliet timijiet għandhom konfronti delikati kontra timijiet li għandhom bżonn il-punti biex fl-aħħar fażi jilagħbu mal-aħjar sitta.
Filwaqt li Floriana jaffrontaw lir-rivali eterni, Sliema Wanderers … Hamrun Spartans jilagħbu kontra l-ġirien Birkirkara … u Marsaxlokk jiffaċċjaw lil Naxxar Lions li bħalissa għandhom moral mill-aktar għoli.
Gzira United jiltaqgħu ma’ Hibernians fejn rebħa għal dawn tal-aħħar hija prioritá.
Valletta jridu jkunu ffokati kontra Tarxien Rainbows minħabba li ma jistgħux ifallu.
Floriana v Sliema W. – Din hija partita li fiż-żminijiet passati kulħadd kien ikun qed jistenna minħabba d-dominanza tagħhom għal għexieren ta’ snin.
Iżda dan l-Old Firm Derby tilef ħafna mill-importanza tiegħu.
Iż-żewġ timijiet jinsabu fil-bżonn tal-punti … Floriana biex jibqgħu l-kmandi tal-klassifika filwaqt li Sliema Wanderers biex jikkwalifikaw mat-Top Six.
Fl-aħħar ħarġa tagħhom, Floriana fallew żewġ punti fid-draw ta’ 1-1 fil-konfront dirett kontra Hamrun Spartans, b’dawn tal-aħħar jiskorjaw, fis-96 minuta, fl-aħħar azzjoni tal-logħba.
Min-naħa tal-Wanderers, dawn ġejjin ukoll minn draw ta’ 1-1 kontra Tarxien Rainbows.
Huma se jkunu msaħħa bir-ritorn ta’ Murilo Henrique Bernardo minn sospensjoni.
Fiż-żewġ partiti preċedenti, Floriana rebħu 2-1 bl-oħra tispiċċa fi draw ta’ 2-2.
Hamrun S. v Birkirkara – Wara l-eliminazzjoni mill-FA Trophy, Hamrun Spartans jiffaċċjaw lil Birkirkara li kkwalifikaw għas-semi- finali ta’ din il-kompetizzjoni.
Iżda din se tkun partita kompletament differenti fejn l-Ispartans qed jimmiraw l-ewwel post filwaqt li l-Istripes qed jimmiraw it-Top Six.
Hamrun għandhom lil Emerson Marcelina sospiż filwaqt li Alessandro Coppola jirritorna għal Birkirkara minn sospensjoni.
Hamrun rebħu ż-żewġ partiti ta’ qabel 2-0 u 6-1.
Marsasxlokk v Naxxar L. – Marsaxlokk jiltaqgħu kontra s-semi-finalisti tal-FA Trophy, Naxxar Lions, konxji mill-fatt li rebħa għal dawn tal-aħħar jilħqu lill-istess Xlukkajri fit-tielet post.
Fil-partita preċedenti, Marsaxlokk, li se jkollhom lura lil Juan Carlos Corbalan, minn sospensjoni, kienu rebħu 1-0.
Gzira U. v Hibernians – Meta l-istaġun huwa mitmum għal Hibernians, iridu jimmiraw li jilagħbu fit-Top Six biex itemmuh fuq nota tajba.
Huma se jkunu msaħħa bir-ritorn ta’ Dexter Xuereb minn sospensjoni.
Il-Pawlisti rebħu ż-żewġ partiti preċedenti bl-iskors ta’ 5-3 u 4-1.
Valletta v Tarxien R. – Friski mir-rebħa fuq Hamrun Spartans biex għaddew għas-semi-finali tal-FA Trophy, Valletta jridu juru rispett massimu lejn Tarxien Rainbow li huma lesti li jqumu għall-okkażjoni.
Huma għandhom lil Moise Mbende sospiż filwaqt lil Miguel D’Alessandro jirritorna għal Tarxien.
Valletta rebħu l-partita tal-Opening Round bl-iskor ta’ 2-1.
Zabbar SP v Mosta – Din hija partita bejn żewġ timijiet li jridu jevitaw ir-relegazzjoni u għaldaqstant jinsabu fil-bżonn tal-punti.
Fiż-żewġ partiti preċedenti, iż-żewġ timijiet spiċċaw fi draws identiċi ta’ 1-1.
