Il-kumitat eżekuttiv tal-Federazzjoni Internazzjonali tal-Blackball (IBF) ħabbret li Malta ntgħażlet sabiex torganizza l-ewwel kampjonati dinjija matul is-sena li ġejja. Dan l-avveniment se jsir bejn it-2 u l-10 ta’ Novembru 2024.
Fi stqarrija l-IBF ikkonfermat din l-aħbar u qalet li tinsab lesta sabiex taħdem ma’ Malta u toffri esperjenza mill-aqwa lill-plejers li se jkunu qed jikkompetu għat-titlu ta’ champions dinjija. L-istqarrija kompliet tgħid li Malta dejjem ġabet riżultati tajbin f’dan l-isport u ċerti li anke mil-lat organizzattiv se jkunu qed jeċċellaw ukoll.
F’kumment qasir, il-president tal-Malta Blackball Federation Philip Gatt laqa’ din l-aħbar u sostna li hu ta’ unur u privileġġ għal Malta li torganizza wieħed mill-aqwa avvenimenti mondjali f’dan l-isport.
Gatt qal li wieħed mill-objettivi bħala federazzjoni li se jkunu qed jaħdmu fiha hi proprju li juru s-sbuħija ta’ din il-logħba lill-Maltin u li fuq kollox il-plejers kollha li se jieħdu sehem jkollhom l-aqwa esperjenza possibbli.
