Il-Ministru għat-Trasport, l-Infrastruttura u x-Xogħlijiet Pubbliċi Chris Bonett indirizza r-raba’ edizzjoni tal-konferenza annwali dwar l-avjazzjoni organizzata mill-kumpanija Deloitte, din is-sena bit-tema ‘Gaining from the boom: Making the most of a thriving market’. Din il-konferenza, li ġabret numru ta’ stakeholders lokali u internazzjonali, seħħet fi sfond ta’ tkabbir bla preċedent fil-qasam tal-avjazzjoni f’pajjiżna.
Il-Ministru Bonett spjega, “Malta stabbiliet ruħha bħala ċentru strateġiku tal-avjazzjoni, li toffri ambjent kompetittiv u favur in-negozju għall-operaturi madwar id-dinja. L-impenn tagħna lejn l-innovazzjoni, is-sigurtà u s-sostenibbiltà jiżgura tkabbir kontinwu u investiment f’dan is-settur kruċjali.” Huwa spjega kif il-gvern iqis is-settur tal-avjazzjoni bħala wieħed mill-pilastri ekonomiċi tal-pajjiż u kif din l-industrija hija element prinċipali fil-viżjoni tal-gvern. “L-investimenti riċenti fis-settur tal-avjazzjoni qegħdin ikomplu jgħinu biex jinħoloq aktar xogħol ta’ kwalità għall-ġid tal-familji f’pajjiżna,” temm jgħid il-Ministru Bonett.
Ir-reġistru tal-ajruplani f’Malta qed ikompli jikber b’rata kostanti b’numru dejjem jiżdied ta’ ajruplani kummerċjali u privati li jagħżlu r-reġistrazzjoni Maltija minħabba l-qafas regolatorju sod u inċentivi fiskali attraenti. Dan wassal biex ir-reġistru Malti llum jaqbeż id-900 ajruplan, id-doppju ta’ ħames snin ilu. Il-fatt li Malta timxi mal-ogħla standards ta’ sigurtà u operat internazzjonali poġġiet lil pajjiżna bħala l-ġurisdizzjoni preferuta għal numru ta’ linji tal-ajru, kumpaniji ta’ kiri ta’ ajruplani u sidien privati.
Malta rat avvanzi kbar li jinkludu titjib fl-Ajruport Internazzjonali ta’ Malta, aktar titjib fis-sistemi tal-immaniġġjar tat-traffiku tal-ajru, u l-espansjoni ta’ faċilitajiet ta’ manutenzjoni, tiswija u rinnovazzjoni (MRO). Dawn l-inizjattivi jsaħħu l-ekosistema tal-avjazzjoni f’Malta u jattiraw aktar investiment dirett barrani.
Matul il-konferenza ġew diskussi diversi temi filwaqt li numru ta’ esperti qasmu l-opinjoni tagħhom ma’ dawk preżenti fuq numru ta’ temi bil-għan li pajjiżna jkompli jikseb suċċess wara ieħor f’dan is-settur.
