Id-Deputat Prim Ministru u Ministru għas-Saħħa Chris Fearne u l-Ministru għas-Saħħa Pubblika ta’ Kuba José Angel Portal Miranda, iffirmaw ftehim li jinkludi diversi opportunitajiet ta’ kollaborazzjoni bejn iż-żewġ pajjiżi f’diversi oqsma relatati mal-qasam tas-saħħa. Dan il-ftehim ġie ffirmat waqt laqgħa bilaterali bejn iż-żewġ pajjiżi fil-75 edizzjoni tal-Assemblea Dinjija tas-Saħħa li qed titlaqqa’ f’Ġinevra.
L-oqsma ta’ kooperazzjoni jinkludu riċerka u skambju ta’ tagħrif u best practices, kollaborazzjoni fis-sistemi ta’ kura primarja fl-oqsma tal-farmaċija u l-bijoteknoloġija fit-taħriġ tal-professjonisti f’oqsma speċjalizzati, u skambju tal-ispeċjalisti fost oqsma oħra relatati mal-kura tas-saħħa u x-xjenza medika.
Id-Deputat Prim Minsitru Malti saħaq li dan il-ftehim huwa l-bidu ta’ programm ta’ kollaborazzjoni medika bejn Malta u Kuba, u awgura li ż-żewġ pajjiżi jibbenefikaw b’mod reċiproku mit-tagħrif maqsum. Il-Ministru għas-Saħħa Pubblika ta’ Kuba esprima l-istess pożittività, fejn irringrazzja lill-Gvern Malti ta’ din l-inizjattiva.
