Fl-aħħar jumejn, Malta ospitat id-disa’ laqgħa tal-MED5. Flimkien, Malta, Ċipru, il-Greċja, l-Italja, u Spanja, qablu fuq pożizzjoni komuni – waħda li tiżgura li l-vuċi MED5 tinstema’ b’mod ċar. L-għan ta’ din il-pożizzjoni hi li tpoġġi ’l quddiem ir-realtajiet u l-isfidi tal-migrazzjoni fil-Mediterran fl-ogħla livell tal-Unjoni Ewropea.
Din il-laqgħa tal-MED5 waslet f’mument kruċjali – ġimgħat biss wara li l-Kummissjoni Ewropea ppubblikat l-ewwel rapport annwali tagħha dwar l-ażil u l-migrazzjoni, li fih ġew identifikati l-Istati Membri li jistgħu jiġu meqjusa taħt pressjoni migratorja. Il-Ministru Byron Camilleri, innota li l-fatt li Malta mhix f’dik il-lista huwa pass sinifikanti ħafna għal pajjiżna u jitkellem volumi. Huwa spjega li dan “Huwa xhieda ċara u innegabbli tal-progress li Malta kisbet u l-effikaċja tal-istrateġija ta’ dan il-Gvern fil-ġestjoni tal-migrazzjoni irregolari billi jiffoka fuq il-prevenzjoni u r-ritorn ta’ migranti irregolari li ma jikkwalifikawx għall-ażil. Matul dawn l-aħħar ħames snin, ma qgħadniex lura milli nieħdu deċiżjonijiet iebsa – iżda meħtieġa, u r-riżultati qed jirriflettu dan ix-xogħol:
- Ritorni: Kellna żieda sa medja ta’ 75% meta mqabbla mal-wasliet irregolari
- Wasliet: Imnaqqsa b’93% fl-aħħar 5 snin, bis-saħħa ta’ politiki effettivi ta’ ritorn għal dawk li ma jikkwalifikawx għall-protezzjoni.”
Fil-laqgħa tal-MED5 tal-lum, l-Istati Membri affermaw mill-ġdid l-impenn tagħhom għall-implimentazzjoni sħiħa tal-Patt Ewropew dwar il-Migrazzjoni u l-Ażil, u ddeskrivewha bħala okkażjoni kruċjali biex jinbena qafas ta’ migrazzjoni ġust u reżiljenti. Il-membri tal-MED5 saħqu li s-solidarjetà trid timxi lil hinn mill-kliem u tagħti riżultati reali u tanġibbli għall-pajjiżi taħt pressjoni.
Il-Ministru aċċenna li d-dimensjoni esterna ma tistax tiġi injorata. Sforzi aktar b’saħħithom dwar il-prevenzjoni u r-ritorni huma essenzjali biex il-politika tal-migrazzjoni kredibbli u effettiva. Huwa appella wkoll għal sħubijiet strateġiċi ma’ pajjiżi terzi, mibnija fuq fiduċja reċiproka u appoġġ lil pajjiżi ta’ tranżitu bħal-Libja, li jiffaċċjaw sfidi enormi fl-iżgurar tal-fruntieri u l-ospitar ta’ għadd kbir ta’ migranti li jirriskjaw ħajjithom fi vjaġġi perikolużi.
Meta kkonkluda l-laqgħa, il-Ministru qal, “Ix-xogħol tagħna mhux lest. Iżda llum, il-MED5 hija aktar b’saħħitha minn qatt qabel – tmexxi diskussjonijiet, tipproponi s-soluzzjonijiet u tiddefendi l-prinċipji tas-solidarjetà u l-qsim ġust tar-responsabbiltà madwar l-Unjoni Ewropea.”
