Il-Ministru għall-Affarijiet Barranin u Ewropej Evarist Bartolo kellu laqgħa mal-Ministru tad-Difiża Tork Hulusi Akar waqt żjara uffiċjali li qed jagħmel f’Malta.
Huma tkellmu fuq it-tisħiħ tar-relazzjonijiet bejn iż-żewg pajjiżi fl-oqsma tal-investiment, l-infrastruttura, it-turiżmu u t-tagħlim tal-Ingliż. Qablu wkoll li Malta u t-Turkija jikkoperaw fil-ġlieda kontra l-kriminalità internazzjonali organizzata, il-ħasil tal-flus, it-traffikar tal-bnedmin, il-kummerċ tad-droga u t-terroriżmu.
Il-Ministru Bartolo wera t-tħassib tiegħu dwar it-tensjoni qawwija fil-Lvant Mediterran u appella għall-kalma, it-tfittxija għall-kompromess u l-ġid komuni, in-negozjati madwar mejda, u l-ħarsien tal-liġi internazzjonali fit-tilwim bejn it-Turkija, il-Greċja u Ċipru.
Dwar il-Libja, il-Ministru Bartolo qal li Malta hija favur Libja waħda, magħquda u f’idejn il-Libjani stess. Il-gwerra mhix soluzzjoni. Il-Libjani għandhom jiġu appoġġjati biex isibu ftehim bejniethom biex pajjiżhom, fost l-aktar sinjuri fil-Mediterran, jieħu r-ruħ għall-ġid tal-poplu Libjan. Paċi u sigurtà fil-Libja huma wkoll essenzjali għall-paċi u s-sigurtà fl-Ewropa u fil-Mediterran.
