L-attakkant ta’ Manchester United, Marcus Rashford, bħalissa jinsab fil-forma ta’ ħajtu. Wara bidu mħallat tal-istaġun, il-livelli tal-prestazzjoni tal-internazzjonali Ingliż żdiedu għaxar darbiet mir-ritorn tal-football domestiku wara t-Tazza tad-Dinja.
Bħalissa Rashford huwa l-aktar player prolifiku fl-Ewropa, wara li skorja 14-il goal f’16-il logħba mill-Boxing Day li għadda. Huwa skorja kontra Barcelona fid-draw ta’ 2-2 tal-Ħamis li għadda fin-Nou Camp, u se jkun qed jimmira li jagħmel l-istess nhar il-Ħamis li ġej f’Old Trafford.
Wieħed jifhimha li l-forma ta’ Rashford ġibdet attenzjoni potenzjali għall-firma tiegħu, u ġie rrapportat li Real Madrid huma wieħed minn dawk il-clubs interessati. Madankollu, Manchester United iffissaw prezz mitlub ta’ €130 miljun sabiex jinfirdu mill-player ta’ 25 sena.
