Manchester City …..4
Real Madrid………….0
(Agg: Man City 5-1)
Manchester City se jiltaqgħu kontra Inter fil-finali tal-UEFA Champions League meta fit-tieni leg tas-semi-finali umiljaw lil Real Madrid bl-iskor ta’ 4-0 għal aggregate ta’ 5-1.
Sa mis-suffara inizjali, Manchester City rebħu l-inizjattiva u b’mod gradwali ġiegħlu lill-Madrileni jirtiraw lura jippruvaw jassorbu l-pressjoni tagħhom.
U proprju fit-12-il minuta, is-Citizens resqu ferm viċin li jiftħu l-iskor meta mill-cross ta’ Jack Grealish, il- goalkeeper Thibaut Courtois salva fuq il-linja fatali d-daqqa ta’ ras ta’ Erling Haaland, b’David Alaba jbiegħed il-periklu.
Fl-20 minuta, Courtois reġa’ kien providenzjali fuq daqqa ta’ ras oħra ta’ Haaland. Iżda tliet minuti wara ma seta’ jagħmel xejn meta ġie megħlub minn Bernardo Silva li kien żmarkat minn Kevin De Bruyne.
Fis-37 minuta, is-Citizens irduppjaw meta x-xutt ta’ Ilkay Gundogan ġie mblukkat iżda mir-rebound Bernardo Silva xeħet fir-rokna ta’ fuq tax-xibka.
Fit-tieni taqsima, it-team immexxi minn Pep Guardiola qagħad jikkontrolla l-andament tal-logħba minkejja li l-avversarji ħarġu mill- qoxra difensiva tagħhom, li iżda, qatt ma nkwadraw il- lasti.
Fl-74 minuta, Courtois reġa’ ċaħħad li Haaland meta antiċipah fil-ħin biex evita goal ċert.
Iżda żewġ minuti wara, is-City żiedu l-vantaġġ minn auto-goal ta’ Diego Militao … biex fit-93 minuta, Julian Alvarez issiġilla r-rebħa għal skor finali ta’ 4-0.
