Manchester United għamlu kuntatt mal-coach Taljan, Antonio Conte, fit-tentattiv li jieħu post Ole Gunnar Solskjaer li jinsab ferm qrib li jitkeċċa mill-kariga.
Ir-Red Devils komplew fil-forma fqira tagħhom dan l-istaġun b’telfa diżastruża ta’ 5-0 f’darhom kontra r-rivali eterni, Liverpool , bil-pressjoni issa tiżdied fuq il-manager Ole Gunnar Solskjaer.
Filwaqt li l-ġerarkija tal-United appoġġjat bil-qawwa lin-Norveġiż, u tatu kuntratt ġdid matul is-sajf, il-wirjiet reċenti wasslu lill-bord tal-klabb biex jevalwa l-għażliet tagħhom.
Solskjaer huwa mistenni li jkun responsabbli għat-tliet logħbiet li ġejjin – kontra Tottenham, Atalanta u Manchester City – iżda l-waqfa internazzjonali imminenti tista’ ġġib magħha l-mument opportun biex potenzjalment jieħu post il-manager jekk ir-riżultati ma jkunux kif mixtieqa.
Il-United għamlu lista qasira ta’ erba’ ismijiet hekk kif qed jikkunsidraw ukoll lil Brendan Rodgers, Zinedine Zidane u l-kowċ ewlieni ta’ Ajax, Erik ten Hag.
Iżda huwa l-eks boss ta’ Chelsea u Inter, Conte, li huwa l-mira numru wieħed tagħhom.
Għalkemm il-kowċ ta’ 52 sena kien maħsub li għandu ftit riservi dwar li potenzjalment jieħu t-tmun f’Old Trafford, issa għamilha ċara lill-United li jrid il-kariga u lest li jieħu post Solskjaer.
Conte normalment ma jkunx ħerqan li jieħu f’idejh tim waqt kampanja, u saħansitra anke rrifjuta offerti f’nofs l-istaġun, iżda jemmen li jista’ jkun utli għar-Red Devils, tant, li huwa ħerqan li jdawwar il-fortuni tagħhom.
