Wara bosta riżultati diżappuntanti fejn tilfu tmien punti mill-aħħar erba’ logħbiet, Manchester United għamlu pass kbir lejn il-kwalifikazzjoni għall-UEFA Champions League meta f’darhom għelbu lil Wolves bl-iskor ta’ 2-0.
B’hekk issa huma jinsabu erba’ punti fuq Liverpool meta fadal tliet partiti għat-tmiem.
Iż-żewġ goals waslu minn Anthony Martial (32). u Alejandro Garnacho (94).
Leeds v Newcastle – Leeds United ospitaw lil Newcastle u spiċċaw fi draw ta’ 2-2 biex biż-żewġ punti li fallew huma baqgħu fiż-żona tar-relegazzjoni.
Il-goals tagħhom waslu minn Luke Ayling (7) u Rasmus Kristensen (79) filwaqt li Callum Wilson (31 pen, 69) kiseb id-draw u poġġa lil Newcastle fil-vantaġġ momentarju.
Patrick Bamford (28) falla penalty għal Leeds li kellhom ukoll lil Junior Firpo (91) imkeċċi.
Aston Villa v Tottenham – Aston Villa ospitaw lil Tottenham u rebħulhom bl-iskor ta’ 2-1 biex laħquhom fis-sitt post tal-klassifika bi Spurs ikomplu jiddiżappuntaw.
Il-goals tal-Villans waslu wieħed f’kull taqsima minn Jacob Ramsey (8) u Douglas Luiz (72) … biex is-solitu Harry Kane (90) naqqas il-marġni għal Spurs mill-11-il metru.
Chelsea v Nottm F. – Chelsea laqgħu lil Nottingham Forest u spiċċaw fi draw ta’ 2-2.
Filwaqt li dan huwa staġun li l-Pensioners iridu jinsew, b’dan il-punt il-Forest għamlu pass ieħor lejn is-salvazzjoni.
Iż-żewġ goals ta’ kull team waslu minn doppjetta kull wieħed minn Taiwo Awoniyi (13, 62) u Raheem Sterling (52, 58).
C. Palace v Bournemouth – F’partita li kienet biss formalitá minħabba li ż-żewġ timijiet salvaw posthom mir-relegazzjoni, Crystal Palace għelbu lil Bournemouth bl-iskor ta’ 2-0 bil-protagonista jkun Eberechi Eze (39, 58) li rreġistra doppjetta.
Southampton v Fulham – Wara 11-il sena fl-ogħla diviżjoni, Southampton sfaw relegati għaċ-Championship meta f’darhom sfaw megħluba minn Fulham bl-iskor ta’ 2-0, bil-goals tal-Cottagers jaslu minn Carlos Vinicius (48) u Aleksandar Mitrovic (72) li kien qed jirritorna wara sospensjoni ta’ tmien partiti.
