Manchester United jistgħu jkunu mingħajr is-servizzi ta’ Luke Shaw għall-bqija ta’ dan l-istaġun.
Il-player internazzjonali Ingliż kellu jiġi sostitwit waqt id-draw ta’ 1-1 tat-team tiegħu kontra Leicester City aktar kmieni dan ix-xahar minħabba kwistjoni relatata ma’ siequ li qabel kienet miksura.
Shaw sofra ksur doppju ta’ riġel waqt konfront taċ-Champions League ma’ PSV Eindhoven fl-2015, u kienu tpoġġew żewġ boltijiet tal-metall f’riġlu waqt l-operazzjoni.
Minn dak iż-żmien il-player ta’ 26 sena għadda minn operazzjoni biex jitneħħew il-boltijiet, u l-manager temporanju tar-Red Devils, Ralf Rangnick, inizjalment qal li d-difensur kellu jkun lura fl-azzjoni fi żmien “ġimagħtejn jew tlieta”.
Madankollu, huwa mifhum li Shaw qed jiffaċċja l-possibbiltà li jitlef il-kumplament tal-istaġun, peress li l-operazzjoni tista’ tieħu aktar żmien milli mistenni biex jirkupra minnha.
Jidher li l-boltijiet ilhom jikkaġunaw uġigħ lid-difensur matul l-istaġun kollu, li wassal biex il-partijiet kollha qablu li l-aħjar ikun li ssirlu operazzjoni.
Shaw għamel 27 dehra għal Manchester United matul dan l-istaġun, u pprovda ħames assists fil-proċess.
It-team immexxi minn Rangnick se jiltaqa’ kontra Norwich City, Liverpool, Arsenal, Brentford, Brighton & Hove Albion, Chelsea u Crystal Palace fl-aħħar seba’ logħbiet tiegħu fil-Premier League.
