Il-kowċ nazzjonali tan-Nisa Manuela Tesse sejħet l-iskwadra finali ta’ 22 plejer li se jkunu qed jivvjaġġaw lejn il-Latvja nhar it-Tlieta. Din hija l-ewwel kompetizzjoni internazzjonali taħt it-tmun ta’ Tesse.
Malta se tkun qed tilgħab f’League C – Grupp 1 u se tiffaċċja l-Latvja, il-Moldova u l-Andorra, f’logħbiet f’darhom u barra minn darhom bejn Settembru u Diċembru. L-ewwel partita ta’ Malta kontra l-Latvja tintlagħab barra minn darhom fit-22 ta’ Settembru fil-Jūrmalas Pilsētas Stadium Sloka, fl-4.30pm ħin lokali. Malta mbagħad tospita lill-Moldova fis-Centenary Stadium il-ġimgħa ta’ wara, it-Tlieta 26 ta’ Settembru fit-8.00pm.
Minn din is-sena, in-Nationa League, kompetizzjoni internazzjonali biennali tat-timijiet tal-kbar tan-nisa, se jkollha tliet kampjonati bi promozzjoni u relegazzjoni bejniethom. Iċ-champions se jiġu determinati minn tournament addizzjonali.
L-attenzjoni fuq din il-kompetizzjoni tkompli tissaħħaħ mill-fatt li se taġixxi wkoll bħala parti mill-proċess ta’ kwalifikazzjoni għall-Kampjonat tan-Nisa tal-UEFA, it-Tazza tad-Dinja tan-Nisa tal-FIFA u t-Tournament Olimpiku tal-Futbol tan-Nisa.
Il-ħames rebbieħa tal-gruppi fil-League C se jiġu promossi għal-League B, filwaqt li t-tliet timijiet l-aħjar klassifikati fit-tieni post fil-League C se jilagħbu kontra t-tliet timijiet l-aħjar klassifikati fit-tielet post tal-grupp B. Ir-rebbieħa se jilagħbu fi grupp B tal-Fażi tal-Kwalifiki Ewropej.
Skwadra Finali ta’ Plejers tat-Tim Nazzjonali Malti tan-Nisa:
GOALKEEPERS – Janice Xuereb (Birkirkara), Maya Cachia (Como)
DIFENSURI – Emma Lipman (Como – Italja), Charlene Zammit (Birkirkara), Stephania Farrugia (Birkirkara), Jessica Lee Dimech (Swieqi United), Valentina Rapa (Birkirkara), Georgiana Mifsud (Valletta), Emma Xuereb (Swieqi United), Ann Marie Said (Birkirkara)
MIDFIELDERS – Rachel Cuschieri (Sampdoria – Italja), Shona Zammit (Swieqi United), Brenda Borg (Mgarr United), Nicole Sciberras (Hibernians), Veronique Mifsud (Birkirkara), Gabriella Zahra (Birkirkara)
ATTAKKANTI – Raina Giusti (Birkirkara), Leah Alice Ayres (Hibernians), Maria Farrugia (Lewes FC – Ingilterra), Maya Lucia (NK Split – Kroazja), Haley Bugeja (Inter -Italja), Ylenia Carabott (London Seaward FC – Ingilterra)
Il-biljetti għall-partita ġewwa darna kontra l-Moldova jistgħu jinxtraw jew mill- grawnd stess fil-ġurnata tal-partita, jew onlajn minn fuq is-sit elettroniku tal-Malta FA.
