Wiċċ Olena Kourilo ta’ 52 sena mimli dmija tista’ tgħid dar madwar id-dinja fl-aħħar sigħat tant li bosta kmamar tal-aħbarijiet ġabu dan ir-ritratt bi prominenza. Hija spiċċat feruta meta ntlaqtet minn ħġieġa ta’ tieqa mfarrka minn missila.
Ġara meta Cuhuïv, il-belt fejn tgħix, intlaqtet minn missili tal-avjazzjoni Russi fl-24 ta’ Frar. Ingħad li l-bumbardament ikkawża tal-inqas diżgrazzja waħda u qered jew għamel ħsara lil ħafna bini, inkluż id-dar ta’ Kourilo, li taħdem bħala għalliema u li mil-lum saret ukoll simbolu tal-attakk li nieda r-Russja fuq l-Ukrajna.
Wara li rċeviet il-kura fl-isptar, Kourilo ġiet intervistata mill-aġenzija tal-aħbarijiet Franċiża AFP u hemmhekk iddeskriviet l-bumbardament. “Jien stajt naħseb biss… m’inix lesta li mmut. Kont taħt xokk, lanqas ħassejt uġigħ, forsi minħabba l-adrenalina”.
“Kelli xortija tajba,” żiedet tgħid, “Naħseb għandi anġlu kustodju b’saħħtu li jħarisni. Id-dar tiegħi nqerdet, lanqas ma baqa’ tieqa u kollox ġie meqrud”.
Cuhuïv għandu madwar 30,000 abitant u jinsab ftit inqas minn 40 km minn Kharkiv, waħda mill-ibliet fil-Lvant tal-pajjiż l-aktar milquta mill- bumbardamenti.
Kourilo spjegat li semgħet li l-istess bumbardament, fil-bini ta’ maġenbha, ikkawża l-mewt ta’ tifla ta’ 13-il sena.
“Ma ħsibtx li nistgħu naslu s’hawn,” żiedet tgħid, “imma se nagħmel minn kollox għall-Ukrajna, sakemm nista’ u bl-enerġija kollha li għandi. Ngħix taħt Putin? Qatt, taħt l-ebda kundizzjoni: aħjar immut”.
