Liverpool mistennija jidħlu f’taqtiegħa mal-ġganti tas-Serie A, Juventus u AC Milan, għall-iffirmar tal-winger ta’ Real Madrid, Marco Asensio.
L-aġent taż-żagħżugħ ta’ 25 sena, Horacio Gaggioli, riċentement żvela li l-klijent tiegħu kien viċin li jħalli l-Bernabeu b’self matul is-sajf, madankollu trasferiment temporanju naqas milli jimmaterjalizza.
Minkejja rapport wieħed li ssuġġerixxa li Arsenal kienu fallew b’offerta ta’ £34 miljun għal Asensio dan is-sajf, issa hemm tliet clubs, Liverpool, Juventus u AC Milan, li qed imexxu t-tellieqa għall-firma tal-winger.
Jurgen Klopp huwa maħsub li huwa ħerqan li jsaħħaħ l-għażliet fl-attakk tiegħu u r-Reds qed jikkunsidraw li jagħmlu pass għal Asensio f’waħda mit-twieqi tat-trasferimenti li ġejjin.
Juventus huma wkoll interessati fl-Ispanjol u jħossu li jista’ jipprovdi kompetizzjoni severa għal Paulo Dybala u Federico Chiesa, filwaqt li AC Milan – li rritornaw fiċ-Champions League dan l-istaġun – jemmnu li jistgħu joffru lil Asensio football regolari tal-ewwel team li l-clubs l-oħra ma jistgħux jiggarantixxu.
Asensio beda l-ewwel logħba tal-kampjonat tiegħu kontra Mallorca nhar l-Erbgħa filgħaxija, u skorja hat-trick għal Los Blancos fir-rebħa tagħhom ta’ 6-1 ġewwa darhom.
