Marsa kisbu rebħa importanti ta’ 1-0 fuq Valletta St Paul’s fl-ewwel impenn tagħhom fil-kampjonat tal-Ewwel Diviżjoni tal-MAFA.
Il-Marsin kienu ġejjin mir-rebħ tal-Joe Compagno Cup u komplew iżommu l-bidu tal-ħolm tagħhom matul dan l-istaġun.
L-uniku gowl tal-partita ġie skorjat minn Kato Yuto fis-17-il minuta.
Referee kien Gordon Barbara.
It-tim promoss ta’ Senglea Gunners għeleb lil San Ġiljan Saints 1-0 grazzi għall-gowl fl-ewwel taqsima ta’ Lamin Jaiteh. Is-Sengleani kellhom iċ-ċans jiskorjaw aktar gowls iżda naqqsu milli jkunu effettivi quddiem il-lasta.
Referee kien Sillah Al Hasana.
Fit-tieni diviżjoni, Attard Edex Kings għelbu lil St Paul’s Bay NMFC 4-2. Felix Silva Roberty kien awtur ta’ tripletta filwaqt li Carvalho de Almeida Lucas żied ieħor għal Attard. Pradip Thapa u Bishal Khawash naqqsu l-marġni tal-iskor għat-tim minn San Pawl il-Baħar.
Referee kien Roderick Micallef.
Swieqi United kisbu rebħa komda ta’ 2-0 kontra Ta’ Ġiorni Wanderers b’Manthrammal Suhail li skorja ż-żewġ gowls għat-tim tiegħu.
Referee kien Jean Pierre Sammut.
Gudja Wanderers kisbu l-ewwel tliet punti tal-istaġun wara rebħa ta’ 2-1 kontra Naxxar Victorians. Awtogowl ta’ Ahmed Khalid Moha u Joseph Duran sabu x-xibka għall-Gudjani b’Takuma Nagai jiskorja l-uniku gowl għal Naxxar.
Referee kien Paul Apap.
F’logħba li ma pproduċiet l-ebda gowl, Ħamrun Sporting u Birżebbuġa St Peter’s AFC ħadu punt kull wieħed fl-ewwel ħarġa tagħhom.
Referee kien Onur Arslan.