Martin Skrtel twieled fil-belt ta’ Handlova, fil-15 ta’ Diċembru, 1984, u għandu 37 sena. Huwa jilgħab bħala difensur ċentrali mat-team Slovakk ta’ Spartak Trnava u llum jista’ jiġi kkunsidrat bħala ex player internazzjonali tas- Slovakkja wara li lagħab għal 15-il sena sħaħ.
B’kollox huwa lagħab 104 partiti għal pajjiżu fejn anke skorja erba’ goals. Ta’ min wieħed jirrimarka li Skrtel huwa t-tielet player li l-aktar lagħab għal pajjiżu wara Marek Hamsik u Miroslav Karhan.
Hu lagħab fit-Tazza tad- Dinja 2010 li saret fl-Afrika t’Isfel u fil-Kampjonat Ewropew 2016 li sar fi Franza.
Il-karriera internazzjonali ta’ Skrtel fuq livell ta’ club kienet waħda mill-isbaħ hekk kif kien jilgħab ma’ FC AS Trencin u Zenit Saint Petersburg.
Madankollu l-qabża fil- kwalitá għamilha f’Jannar 2008 meta ngħaqad mal-ġganti Ingliżi Liverpool għas-somma ta’ £6.5 miljun.
Magħhom hu għamel tmien snin fejn lagħab 319-il partita u skorja 18-il goal.
Il-karriera ta’ Skrtel kompliet fit-Turkija fejn ingħaqad ma’ Fenerbache. Fit-tliet snin li għamel fis- Suklu Saracoglu Stadium hu skorja sitt goals f’79 partita. Aktar tard lagħab ukoll fis-Serie A Taljana ma’ Atalanta u Istanbul Basaksehir fit-Turkija.
Matul il-karriera tiegħu huwa rebaħ il-kampjonat Russu ma’ Zenit u l-League Cup ma’ Liverpool filwaqt li ntgħażel bħala l-Player tas-Sena fis-Slovakkja għal erba’ darbiet.
Ftit tal-jiem ilu, Skrtel kien f’Malta għall-kamp ta’ taħriġ mat-team tiegħu Spartak Trnava.
Dawn ħadu sehem fit-Tip Sports Malta 2022 fejn spiċċaw fit-tieni post ta’ din il-kompetizzjoni wara r- rebbieħa Sigma Olomuc tar-Repubblika Ċeka. Din mhux l-ewwel darba li hu ġie Malta minħabba li ftit tas-snin ilu kien involut mat-team nazzjonali ta’ pajjiżu f’partita kontra t-team nazzjonali Malti.
Kif bdiet l-imħabba tiegħek lejn il-football?
Bħal kull tifel ieħor kont nilgħab il-football ma’ sħabi tal-iskola jew inkella konna niltaqgħu erbat iħbieb fil-ground ta’ Handlova, il-belt fejn twelidt.
Minn dejjem kelli x- xewqa li nkun player tal-f ootball u kien għalhekk li ommi u missieri kienu kitbuni ma’ club fis-Slovakkja bl-isem ta’ Banik Prievidza.
Kien għad kelli biss sitt snin iżda qatt ma ħarist lura jew inkella qtajt qalbi. Minn dejjem smajt mill- coaches li ħarrġuni u nista’ ngħid li fil-11-il sena li qattajt hemmhekk tgħallimt ħafna.
Kif għedt int stess qatt ma ħarist lura u forsi kien għalhekk li lgħabt ma’ diversi timijiet prestiġjużi Ewropej.
Il-karriera professjonali tiegħu bdiet meta kelli 17-il sena fejn xi scouts mill-club lokali ta’ FK AS Trencin kienu ġew jarawni nilgħab.
Ftit tal-jiem wara rċevejt telefonata li l-coach ta’ dak iż-żmien riedni għall-prova. Kburi ngħid li mort tajjeb ħafna tant li offrewli kuntratt ta’ tliet snin. Fil-fatt għamilt tliet snin ma’ dan il-club fejn bdejt nistabilixxi ruħi bħala player tal-football.
Minn hemm ġieni ċ-ċans li mmur nilgħab barra minn pajjiżi fejn ġew għalija Zenit St Petersburg.
B’xorti tajba ftit domt sabiex ambjentajt ruħi minħabba li fit-team kien hemm ħafna plejers Ċeki u Slovakki u għalhekk apparti li kont naf il-lingwa, bdejt nidra sew.
Minkejja kollox, il-kbir kien għadu ġej minħabba li fis-sena 2008 ġejt akkwistat minn Liverpool. Dan kien pass kbir fil-karriera tiegħi minħabba li kont se nilgħab f’kampjonat kompetittiv u ta’ prestiġġju.
Dak iż-żmien il-coach kien Rafael Benitez li m’għandu bżonn tal-ebda introduzzjoni fil-football. Għażilt in-numru 37 u niftakar li l-coach kellu fiduċja kbira fija.
Niftakar sewwa li waħda mill-aqwa logħbiet li għamilt fil-bidu tal-karriera tiegħi f’Merseyside meta lgħabna kontra Chelsea u ġejt ivvutat bħala l-aqwa player tal-logħba. Minn hemm indunajt li kont lest sabiex nikkompeti kontra l-aqwa players fl-Ewropa.
Kienu tmien snin verament sbieħ f’Anfield fejn laqqgħuni ma’ diversi players u coaches u li ngħożżhom kemm indum ħaj.
Wara karriera qasira ma’ Istanbul Basaksehir, issa nerġa’ ninsab lura f’pajjiżi ma’ Spartak Trnava.
Semmejt lil Spartak Trnava. Matul dan l-istaġun tinsabu viċin il-leaders Slovan Bratislava. Kemm temmen li kapaċi tirbħu l-kampjonat?
Bħalissa ninsabu t-tieni fil-klassifika, erba’ punti bogħod minn Slovan Brastislava. Nemmen li għandna players ta’ kwalitá u kapaċi jagħmlu d-differenza u għalhekk nemmen li kollox għadu possibbli.
Jien nemmen li importanti li tieħu kollox pass pass. Jekk nibqgħu nagħtu l-massimu tagħna, fiduċjuż li nilħqu t-tragwardi tagħna.
Semmejt lil Rafael Benitez. Dan tak ħafna fiduċja fl-ewwel snin tiegħek f’Anfield. X’tikkummenta?
Iva, il-coach Benitez kien determinanti sabiex nidra mill-ewwel l-ambjent fl-Ingilterra.
Kien jagħtini ħafna kuraġġ, kien jidher li kellu fiduċja fija u fuq kollox jien kont nagħmel minn kollox sabiex ma niddiżappuntahx. Huwa dejjem kien irid iktar mingħandi u jien kont nagħti aktar mill-mija fil-mija tiegħi biex filwaqt li nintgħażel fil-formazzjoni inizjali, inkompli ngħin lit-team inbiegħed lill-attakkanti avversarji.
Nerġgħu nduru lejn din l-esperjenza li għandek f’Malta bħalissa. Kif qed issib ruħek?
Nista’ ngħidlek li din mhux l-ewwel darba li ġejt f’Malta. Ftit tas-snin ilu lgħabt mat-team nazzjonali ta’ pajjiżi proprju fl-Istadium Nazzjonali u kont naf x’ambjent se nsib.
Ninsab kuntent li qiegħed hawnhekk mat-team speċjalment minħabba l- klima sabiħa li għandkom hawnhekk.
Bħalissa s-Slovakkja miksija bis-silġ, hemm ħafna maltemp u kesħa u għalhekk il-kampjonat ikollu jieqaf. Il-grounds tal-ħaxix naturali ma jistgħux jintużaw u għalhekk ħafna mit-taħriġ ikollu jsir fuq turf artifiċjali li żgur mhux ideali.
Hawnhekk l-atmosfera u t-temp huma ferm differenti u hawn faċilitajiet mill- aqwa.
Personalment ingħaqadt mal-iskwadra proprju għal- logħba kontra Aalborg u nittama li nagħti l-aqwa tiegħi f’din il-partita filwaqt li nkomplu nieħdu vantaġġ minn din iż-żjara tagħna f’Malta.
Kif qed tarah il-futur tiegħek?
Illum il-ġurnata għandi 37 sena. Għandi kuntratt ma’ Spartak Trnava sal-aħħar ta’ dan l-istaġun u għalissa qed nimxi ġurnata b’ġurnata imbagħad naraw x’jiġri.
Fil-mument preżenti qed nieħu gost nilgħab il-football u kuntent b’dan it-team, bil-kollegi tiegħi, il-coach u l-membri tal-istaff.
Qed niffoka fuq it-tieni parti tal-istaġun li naf li mhux se tkun faċli għalkemm ninsabu f’pożizzjoni tajba.
