Il-midfielder ta’ Manchester United, Mason Greenwood, inżamm taħt arrest preventiv wara li nhar it-Tnejn deher quddiem il-qorti f’Manchester. Is-smiegħ li jmiss se jkun fil-21 ta’ Novembru li ġej.
Greenwood qed jiġi akkużat b’attentat ta’ stupru, imġiba ta’ kontroll u attakk fuq is-sieħba tiegħu.
Barra minn hekk l-Imħallef distrettwali sab li Greenwood kien kiser ukoll il-kundizzjonijiet tal-pleġġ li kien ingħata mill-qorti.
Inizjalment huwa kien arrestat f’Jannar li għadda iżda kien akkużat biss fi tmiem il-ġimgħa li għadda ftit wara li reġa’ ġie arrestat għal dan il-ksur tal-kundizzjonijiet tal-pleġġ.
Sadanittant, Manchester United ikkonfermaw li sakemm jinqata’ l-każ, Greenwood se jibqa’ sospiż mill-club.
Greenwood ilu ma jilgħab ma’ Manchester United mir-rebħa tagħhom ta’ 1-0 kontra West Ham f’Jannar, jiem qabel l-ewwel arrest tiegħu.
