Mino Raiola ikkonferma li Matthijs de Ligt jinsab ħerqan li jħalli lil Juventus u jfittex sfida ġdida fis-sajf li ġej.
Il-Bianconeri rebħu tellieqa kompetittiva għall-internazzjonali Olandiż fl-2019, u minn dakinhar kompla biex għamel 94 dehra għall-club fil-kompetizzjonijiet kollha.
Madankollu, Juventus tħabtu biex jiskbu s-suċċess riċenti tagħhom fl-aħħar żewġ staġuni, fejn tilfu t-titlu tas-Serie A għall-ewwel darba mill-istaġun 2010-11 u bħalissa jinsabu fis-seba’ post tal-klassifika.
L-aġent ta’ De Ligt issa kkonferma li ż-żagħżugħ ta’ 22 sena huwa “lest għal pass ġdid”, u żvela li bidla għall-Premier League tista’ tkun fuq l-aġenda.
Clubs bħal Chelsea, Manchester City, Manchester United u Tottenham Hotspur fil-passat ġew akkreditati b’interess f’De Ligt, iżda Raiola kkonferma wkoll li Barcelona, Real Madrid u Paris Saint-Germain x’aktarx li jkunu wkoll fit-tellieqa għall-akkwist tiegħu.
“Naħseb li lkoll nafu liema clubs jinsabu interessati f Matthijs de Ligt għall-‘pass li jmiss’ tiegħu. Naraw dan is-sajf,” qal Raiola.
“Premier League? Jista’ jkun, imam hemm Barcelona, Real Madrid u Paris Saint-Germain ukoll interessati fl-akkwist tiegħu.”
Chelsea huma maħsuba li huma wieħed mill-aktar clubs interessati fl-ex captain ta’ Ajax, bid-difensuri attwali Antonio Rudiger, Andreas Christensen u Cesar Azpilicueta kollha jinsabu fl-aħħar sitt xhur tal-kuntratti tagħhom fi Stamford Bridge.
