Max Verstappen tar-Red Bull irnexxielu jegħleb l-attakk aħħari minn Charles Leclerc tal-Ferrari biex rebaħ il-Grand Prix inawgurali ta’ Miami.
Verstappen kien deher li sejjer lejn rebħa faċli wara li qabeż lil Leclerc kmieni fit-tiġrija iżda s-safety car li ħarġet wara aċċident, għaxar dawriet mit-tmiem, rat lil Leclerc jersaq lejn Verstappen biex hemm bdiet it-taqtiegħa bejniethom.
Fl-aħħar ħames dawriet Leclerc resaq viċin biżżejjed lejn is-sewwieq Olandiż u beda jattakka b’mod qawwi, tant, li kien hemm mumenti li seta’ mar fil-vantaġġ.
Iżda Verstappen baqa’ jżomm sod biex qatt ma ċeda l-ewwel post bil-konsegwenza li ħareġ rebbieħ issa naqqas id-distakk għal 19-il punt fil-klassifika ġeneral mil-leader Leclerc.
Huwa rebaħ f’ħin ta’ 1:34:24.258.
Fit-tielet post temm l-Ispanjol Carlos Sainz (Ferrari) li kien segwit mill-Messikan Sergio Perez (Red Bull), il-Britanniċi tal-Mercedes George Russell u Lewis Hamilton, il-Finlandiż Valtteri Bottas (Alfa Romeo) u l-Franċiż Esteban Ocon (Alpine).
Ta’ min jgħid ukoll li Hamilton reġa’ ddiżappunta hekk kif issa jinsab fis-sitt fil-klassifika ġenerali li taqra:
104 – Charles Leclerc
85 – Max Verstappen
66 – Sergio Perez
59 – George Russell
53 – Carlos Sainz
36 – Lewis Hamilton
35 – Lando Norris
30 – Valtteri Bottas
