Riċerka li saret b’mod indipendenti minn Esprimi dwar is-sodisfazzjon tal-klijenti mal-operaturi Maltin tat-telekomunikazzjoni wriet li l-klijenti ta’ Melita huma l-aktar kuntenti bis-servizz li qed jirċievu. Dawn ir-riżultati, minn stħarriġ ta’ 800 persuna, huma appoġġjati mill-Customer Satisfaction Score b’punteġġ ta’ 9/10, iġġenerat minn fornitur ta’ parti terza, Nicereply, bl-użu ta’ metodoloġija rikonoxxuta internazzjonalment. Il-feedback għal dan il-punteġġ jinġabar mill-klijenti ta’ Melita kull meta jinteraġixxu mal-kumpanija jew billi jikkuntattjaw lill-customer care, imorru f’ħanut ta’ Melita, jew jirċievu żjara mingħand tekniku jew installatur.
Harald Roesch, Kap Eżekuttiv ta’ Melita Limited, qal, “Riċerka indipendenti ssostni d-dejta tagħna stess li turi li Melita qed tkompli tikseb uħud mill-ogħla punteġġi ta’ sodisfazzjon tal-klijenti madwar l-Ewropa fejn jidħlu l-operaturi tat-telekomunikazzjoni. Ovvjament, se nkomplu nimxu ‘l quddiem iżda huwa ċar li l-investimenti kbar li għamilna fit-twassil tal-uniċi netwerks f’Malta tal-internet ta’ 1,000 Mbps u 5G mobajl, kif ukoll fir-riżorsi umani u l-customer care tagħna qed ikomplu jirriżultaw f’esperjenza aħjar għal klijenti.”
