In-numru ta’ katavri rikoverati fin-Norveġja tela’ għal sebgħa hekk kif l-awtoritajiet komplew bit-tfittxija wara li valanga kbira qerdet diversi residenzi fil-pajjiż.
Bejn il-Ġimgħa u s-Sibt nstabu l-ewwel erba’ katavri u lbieraħ nstabu tlieta oħra. L-ewwel vittma ġie identifikat bħala Eirik Grønole ta’ 31 sena. Xi persuni għadhom neqsin u minkejja li l-membri tas-salvataġġ għadhom qed jittamaw li jsibu persuni ħajjin, din il-probbabbilità qed tgħib aktar kemm jgħaddu sigħat.
Il-Pulizija kkonfermat li l-aħħar katavru nstab fejn it-tnejn ta’ qablu, iżda ma komplietx tagħti informazzjoni dwar il-ħidma tagħha.
Fost il-vittmi hemm raġel ta’ 40 sena u bintu ta’ sentejn. Għaxar persuni oħra ndarbu f’dan l-inċident.
