Hekk kif ilbieraħ kompla jinstema’ l-ġuri ta’ raġel akkużat bl-istupru ta’ martu, spikkat ix-xhieda tal-vittma, li rrakkontat b’leħinha miksur u bid-dmugħ f’għajnejha dak li għaddiet minnu.
L-allegat każ seħħ fil-31 ta’ Mejju 2019 wara li l-akkużat wasal lura minn każin u talabha tagħmel is-sess miegħu. Ir-raġel ta’ 38 sena minn Ħal Tarxien qed iwieġeb mhux ħati għall-akkużi miġjuba kontrih, li jinkludu wkoll il-pussess ta’ droga kokaina.
Quddiem l-Imħallef Consuelo Scerri Herrera, il-mara xehdet li ż-żewġt uliedhom kienu reqdin fl-istess dar waqt li żewġha allegatament beda jistupraha. Tgħid li ddeċidiet li toqgħod kwieta u ma tgħajjatx biex ma tqajjimx lit-tfal.
Il-mara qalet ukoll li żewġha beda jgħidilha “tibkix għax tirvillani.” Kompliet tgħid li l-imħabba tagħha lejh kienet sfaxxat fix-xejn għaliex l-akkużat ta’ sikwit kien jgħajjarha u xi drabi anke jkun aggressiv fil-konfront tagħha.
L-Imħallef Scerri Herrera staqsiet lix-xhud x’ġara wara l-istupru, bil-mara tgħid li l-akkużat kien f’sakra kbira u raqad filwaqt li hi libset u raqdet fl-istess sodda.
Mistoqsija dwar ir-raġuni għalfejn raqdet fl-istess sodda miegħu wara li allegatament stupraha, ix-xhud wieġbet “mhux inutli nitlaq mis-sodda. Mentalment kont imkissra. Spiss kien jgħidli li jien martu u jagħmel bija li jrid.”
Dwar l-inċident ta’ Jannar, il-mara rrakkontat li ġiet stuprata wara li r-raġel kien irċieva l-karti tas-separazzjoni għand ommu. Kompliet tixhed li l-akkużat kellu l-vizzju tax-xorb u meta kien ikollu “drink ġo moħħu ma kienx jirraġuna”.
Fil-kontro-eżami, l-Avukat Difensur staqsa lill-vittma għaliex ma rrapportatx l-episodji li xehdet dwarhom. Hija qalet li beżgħet li l-akkużat jeħdilha l-ħanut u tispiċċa bla saqaf fuq rasha u fuq ras uliedha għaliex spjega li l-art li fuqha nbniet id-dar kienet tiegħu. Qalet li waqt is-separazzjoni saret taf li r-raġel mar jagħmel konvenju fuq darhom mingħand il-ġirien.
Fis-seduta tal-bieraħ xehdu wkoll it-Tabib Forensiku Mario Scerri u l-Ġinekoloġista Alison Micallef Fava – li kienu eżaminaw lill-vittma fl-Isptar Mater Dei, u ħabiba tal-vittma.
Intant, wara li l-Prosekuzzjoni ddikjarat li ma kellhiex aktar provi xi tressaq, id-Difiża qalet li l-akkużat ma kienx se jixhed.
Il-Prosekuzzjoni qed titmexxa mill-Avukati Darlene Grima u Jennifer Polidano mill-Uffiċċju tal-Avukat Ġenerali. L-akkużat għandu jiddefenduh lill-Avukati Simon Micallef Stafrace u Julia Micallef Stafrace.
