F’diskors fl-okkażjoni ta’ Jum il-Mara l-President tal-Parlament Ewropew Roberta Metsola tkellmet dwar “diskussjoni taħraq” li kellha meta kienet studenta rigward jekk għandux jiġi ċċelebrat jum il-mara.
Metsola qalet li tixtieq li jasal iż-żmien li ma jkollniex għalfejn niċċelebraw dan il-jum għax tintlaħaq ugwaljanza vera u sħiħa f’kull livell.
Filwaqt li rrikonoxxiet l-ugwaljanza li ntlaħqet fl-edukazzjoni fejn twaqqgħu ċertu barrieri, saħqet li jeħtieġ li din tintlaħaq f’oqsma oħra.
Metsola elenkat xi punti ta’ riferiment ta’ inugwaljanza fis-soċjetà moderna. Sostniet li ħafna drabi dak li jgħodd għall-mara għandu jgħodd għar-raġel u bil-maqlub. Qalet li mhijiex ġustizzja li nisa jitħallsu anqas għall-istess xogħol li jagħmlu l-irġiel.
Tkellmet ukoll dwar is-servizz tac-Childcare u l-fatt li ħafna drabi jiġi assoċjat bħala servizz għall-mara li jgħinha biex tibqa’ f’impjieg jew toħroġ taħdem.
Hija kkundannat il-vjolenza domestika u qalet li din hija ħażina kkundannabbli ssir fuq min issir, l-istess l-abbuż sesswali u dak finanzjarju.
Il-President tal-Parlament Ewropew qalet li jeħtieġ li dawn il-problemi jiġu indirizzati bi strutturi apposta biex idealment jiġu eliminati.
“Irid ikollna aġenda li telimina l-abbużi fiżiċi, mentali u emozzjonali għal kulħadd”, kompliet Metsola.
Filwaqt li temmet tawgura lin-nisa kollha li qegħdin jagħmlu suċċess, Metsola temmet tgħid li waħda mir-raġunijiet għaliex hi tinsab fil-politika hija proprju għax titħasseb u tinkwieta għal dawk li għaddejjin minn xi problemi.
