Amhed Hamed, Sirjan ta’ 25 sena, ma nstabx ħati li stupra tfajla Spanjola f’għeluq sninha fuq il-bajja ta’ San Ġorġ, San Ġiljan, Dan wara li l-Qorti qalet li mill-provi li tressqu quddiemha, ma setgħetx tasal għall-konklużjoni li l-akkużat wettaq dan l-att mal-allegata vittma mingħajr il-kunsens tagħha.
Is-Sirjan kien tressaq fil-Qorti mixli li fil-lejl ta’ bejn it-23 u l-24 ta’ Frar 2019 stupra lit-tfajla wara li ltaqgħu fi stabbiliment tad-divertiment f’Paceville.
It-tfajla kienet saħqet li l-imputat ma sfurzahiex biex tmur ħdejn il-baħar miegħu u sakemm kienu qed jitkellmu hemm għall-ewwel ħassitha komda u ma kien hemm xejn x’jindika li se jiġrilha xi ħaġa. Dan sakemm, l-akkużat allegatament imbuttahha, ċartilha l-qalziet u stupraha.
Hija spjegat li pprovat twaqqfu iżda ħadd ma seta’ jgħinha billi kienu waħedhom fuq il-bajja u dak il-ħin kienet nieżla x-xita. Qalet li huwa kien tbissem u ħallieha tibki fuq il-bajja.
Fis-sentenza tagħha, il-Qorti preseduta mill-Maġistrat Gabriella Vella nnotat li t-tfajla qatt ma allegat li ma kinitx konxja ta’ dak li kienet qiegħda tagħmel u ta’ dak li kien qed jiġrilha, anzi pjuttost il-kuntrarju.
“Hija marret ħdejn il-baħar mal-imputat, u dan, fi kliemha stess mingħajr ma hu ġegħelha tmur hemm miegħu, kienu qed jitkellmu u sa dak il-ħin kienet komda u rilassata. Iżda mbagħad, dejjem skontha, l-imputat imbuttaha mal-art u sforza ruħu fuqha, fejn hi għamlet minn kollox biex tirreżistieh.
“Huwa evidenti li n-nuqqas ta’ kunsens min-naħa tagħha qed torbtu mar-reżistenza tagħha għall-isfurzar tal-imputat fuqha u mhux ma’ xi fattur ieħor, tipo li kienet fis-sakra u ma kinitx taf x’qed tagħmel jew x’qed jiġrilha.
“Din ir-reżistenza però u b’hekk dan-nuqqas ta’ kunsens ma jirriżultawx mill-provi. Jiġi mfakkar li l-evidenza li kellu u li sab l-espert mediku, kkonkluda li ma sab l-ebda evidenza ta’ trawma sesswali,” saħqet il-Qorti filwaqt li qalet li ma tistax tasal għall-konklużjoni li seħħ stupru u għalhekk illiberat lill-imputat minn kull ħtija.
Il-Prosekuzzjoni tmexxiet mill-Ispettur Jean Paul Attard.
