“F’dan il-mument kritiku mhux tqassim ta’ rigali hemm bżonn iżda għajnuna: mhux politika ta’ Father Christmas iqassam ir-rigali imma solidarjetà soċjali, reali u iffukata fuq min għandu bżonn.” Dan qalu Carmel Cacopardo, Chairperson ta’ ADPD – The Green Party waqt li kien qed jindirizza konferenza stampa fi Pjazza Reggie Miller il-Fgura dalgħodu.
Il-Kandidat ta’ ADPD Brian Decelis qal li n-nefqa ta’ €70m li tħabbret mill-Gvern din il-ġimgħa ftit tagħmel distinzjoni bejn dawk li l-aktar għandhom bżonn u oħrajn.
Huwa qal: “Il-Gvern hu għaldaqstant żbaljat li flok ma jiffoka l-għajnuna fuq min verament għandu l-ħtieġa tal-għajnuna jifrex ir-riżorsi limitati tal-pajjiż fuq kulħadd: jekk se jagħmel hekk, fil-prattika ma jkun qiegħed jgħin lil ħadd. Ikun biss eżerċiżżju propagandistiku ta’ lejliet l-elezzjoni intenzjonat biss biex kulħadd “jieħu xi ħaġa”.”
Cacopardo qal li dan l-iżball li jifrex l-għajnuna fuq kulħadd, inkluż fuq min m’għandux bżonn, iwassal għall-isparpaljar tar-riżorsi tal-pajjiż kif diġà qed jiġri f’oqsma oħra.
Huwa qal: “F’dan il-mument kritiku mhux tqassim tar-rigali hemm bżonn iżda għajnuna ta’ vera: mhux politika ta’ Father Christmas iqassam ir-rigali imma solidarjetà soċjali, reali, iffukata fuq min għandu bżonn.”
Żied jgħid: “Huwa tajjeb li fiċ-ċirkustanzi tal-lum ikun sussidjat il-konsum bażiku tal-elettriku: imma hu ħażin li dan is-sussidju jkun mifrux “across the board”. Ikun xieraq jekk min jikkonsma iżżejjed iħallas ta’ dak li qed jikkonsma mingħajr ma jibbenefika minn sussidju. Dan jgħodd ukoll għall-petrol u għad-diesel. Ir-riżorsi tagħna bħala pajjiż huma limitati. Jagħmel għaldaqstant sens li l-għajnuna tkun iffukata fejn hemm il-ħtieġa u mhux tkun mifruxa.”
“Flok politika li tqassam hemm ħtieġa ta’ politika li tgħin lil min verament għandu bżonn, politika ta’ solidarjetà soċjali mhux politika ta’ Father Christmas,” temm jgħid Cacopardo.
