Minn Cristian Muscat
Kif bdiet l-imħabba tiegħek lejn il-waterpolo?
Minn meta kont għadni żgħir, dejjem kelli mħabba lejn l-għawm u sport relatat miegħu.
Meta kelli 10 snin, Neptunes kienu ssuġġerew li nibda nipprattika l-għawm qabel ma nkompli bil-waterpolo.
Nista’ nghid li l-goalkeeper Jake Tanti kien protagonista assolut sabiex bdejt inħobb il-waterpolo. Wara s-sessjonijiet tal-għawm li kien ikolli, kien ikun hemm il-logħob tal-Youths fil-pitches, fejn mill-ewwel kien laqatni l-goalkeeper, Jake Tanti, li kien protagonista fil-logħob, tant li ħajjarni nibda nilgħab il-waterpolo, u anke nilgħab fil-pożizzjoni tiegħu.
Irrid nirringrazzja wkoll lill-ewwel coach tiegħi Ġużi ‘l-Ors’ Attard li kien ħajjarni biex nibda l-waterpolo kif ukoll għeni nkompli nikber fil-logħba li tant inħobb.
X’tikkummenta fuq ir- riżorsi (pixxina) li fihom tittrenjaw u tilagħbu f’Malta?
Għalkemm il-pixxina tinżamm f’kundizzjoni tajba ħafna, ir-riżorsi huma skarsi, kif ukoll in-nuqqas ta’ pixxini oħra tillimita l-potenzjal li dan il-pajjiż jista’ jilhaq f’dan l-isport għax il-ħin ta’ taħriġ ikun limitat għal siegħa u kwart biss.
X’sagrifiċċji jinvolvi li tkun player tal-waterpolo?
Biex tkun player tal-waterpolo, is-sagrifiċċji huma kbar għax biex tilgħab trid tkun fl-aqwa kundizzjoni possibli.
It-taħriġ ma jieqafx biss fil-pixxina imma trid taħdem ħafna wkoll fil-gym biex tilħaq ċerti livelli. Nitkellem għalija, sagrifiċċju ieħor huwa meta jasal tmiem il-ġimgħa wkoll.
Meta kulħadd ikun qed jieħu gost, trid tibqa’ ftit lura minħabba li jkollok it-taħriġ jew il-logħob fil-ġurnata ta’ wara.
Il-ħajja tiegħek trid tipprova iddawwarha madwar il-waterpolo sabiex tlaħħaq ma’ kollox kif ukoll tibqa’ titjieb fil-logħba. Noqgħod attent ukoll ħafna x’niekol sabiex ikolli l-aqwa fiżika meta jiġi l-perjodu tal-logħob.
Kif jirnexxielek tlaħħaq mat-taħriġ, l-istudju u mal- waterpolo?
Li nlaħħaq mat-taħriġ u l-istudju hi waħda mid-diffikultajiet li nħoss il-piż tagħha.
L-istudju u t-taħriġ huma żewġ affarijiet li joħdulek ħafna enerġija u ħin minn ħajtek. Biex tlaħħaq sew, irid ikollok time management tajjeb ħafna.
Fiż-żmien tal-iskola, nipprova nistudja fil-breaks ta’ bejn il-lectures, kif ukoll nipprova ma naħlix ħin fuq il-mobile, u nieħu l-isport bħala break mill-istudju.
Trid tagħmel ukoll sagrifiċċju li tkompli tistudja wara t-taħriġ, f’ħin li fih ħafna minn nies ikunu reqdin jew qed jirrilassaw.
Fi tmiem il-ġimgħa, fejn ħafna jeħduh bħala mistrieħ mill-ġimgħa li tkun għaddiet … minflok trid ittella’ x-xogħol tal-iskola tal- ġimgħa li tkun għaddiet sabiex ma taqax lura fix-xogħol.
Kif tiddeskrivi l-aħħar staġun tiegħek ma’ Ta’ Xbiex kemm għalik personali kif ukoll bħala team?
F’għajnejja, l-istaġun li għadda kien ta’ suċċess kbir ma’ Ta’ Xbiex, li ma setax ikun possibbli mingħajr l-għajnuna tal-coach Christian Presciutti li għen lil kull individwu jikber għalkemm kellna team ta’ etá medja ta’ 15-il sena u għalhekk wieħed kien iqis dan it-team bħala underdog team.
Għalija, kien unur kbir li kelli lill-coach Christian Presciutti bħala l-coach tiegħi, għaliex huwa wieħed mill-iktar players dekorati fl-istorja tal-waterpolo, u għalhekk għeni ħafna biex intejjeb il-logħba tiegħi.
Għalkemm konna team żgħir, morna tajjeb ħafna bħala team, tant li spiċċajna t-tielet fil-kampjonat tal-Ewwel Diviżjoni b’rebħiet fuq timijiet ta’ qawwa bħal Sirens, u kważi lħaqna l-finali tan-Knock-Out.
Sfortunatament, ma stajtx inlesti l-kampjonat u n-Knock-Out għax kont imradt u t-tobba kienu qaluli li aħjar ma nissugrax inkompli nilgħab il-kampjonat.
Individwalment, ħassejt li din l-esperjenza għenitni nikber ħafna, kif ukoll ġibdet l-attenzjoni ta’ ħafna clubs lokali.
Kif qed tħares lejn l-esperjenza ġdida ma’ Birzebbugia ASC?
L-ewwelnett, nixtieq nieħu l-opportunitá biex nirringrazzja lil Birzebbugia li tant emmnu fija u tawni l-opportunitá biex nuri x’naf f’dan l-isport, kif ukoll nuri li nista’ nilgħab fl-ogħla diviżjoni tax-xena lokali għalkemm għadni żgħir fl-etá u r-rwol ta’ goalkeeper huwa wieħed kruċjali u meqjus bħala l-pożizzjoni li trebbaħ jew ittellef il-logħba.
Din l-esperjenza qed inħares lejha b’mod ta’ sfida sabiex nikseb posti fost l-aqwa players hawn Malta.
Bl-għajnuna tal-coach Pierre Borg u sħabi, naħseb li nista’ nikseb dak li rrid, kif ukoll nilħqu l-proġett li qed nimmiraw għalih flimkien.
Dan huwa l-bidu tal-proġett imma jien ċert li sa ftit tas-snin oħra, Birzebbugia se tkun qawwa fix-xena lokali tal-waterpolo, kif ukoll tikkompeti għar-rebħ tal-unuri.
Taqbel mas-sistema tal-play-offs?
Għalija, is-sistema tal-play-offs hija waħda li naqbel magħha. Dan għaliex din is-sistema tħalli ħafna bibien miftuħa għal kull club biex jilħaq l-aqwa livell possibli sabiex jibqa’ Premier u b’hekk ħadd ma jkollu postu garantit.
Bil-play-offs, il-kampjonat jibqa’ miftuħ sal-aħħar ġurnata tal-kampjonat u għalhekk iżomm lill-partitarji akkaniti.
Li hemm ftit negattiv dwar din is-sistema, hi li jekk team ikun staġun sħiħ konsistenti, u toħroġlu logħba ħażina fl-aħħar stadji tal-kampjonat, dan jiġi penalizzat u għalhekk dawk il-logħob li jkun lagħab qabel, ikunu intlagħbu kollha għalxejn.
Tqis li fil-futur tissejjaħ mill-coach Karl Izzo biex imbagħad tifforma parti mit-team nazzjonali Malti?
Bħalissa ninsab iffukat fuq it-team nazzjonali ta’ Taħt id-19-il sena li hu mmexxi mill-coach Anthony Farrugia u Dejan Ilic.
Inħoss li għandi relazzjoni tajba ħafna mal-coach Karl Izzo, tant li taħt il-gwida tiegħu, dejjem iffurmajt parti mit-team nazzjonali fis-sezzjoni tal-Youths.
Jekk inkompli naħdem u nuri x’naf matul l-istaġun li ġej, naħseb li jkolli ċans nifforma parti mit-team nazzjonali tal-kbar.
Din se tkun l-ewwel esperjenza tiegħi li nikkompeti fil-Kampjonat Premier fis-sajf u għalhekk din is-sena nista’ nara f’liema kategorija nista’ nilgħab.
Għalkemm il-pożizzjoni ta’ goalkeeper fiha ħafna kompetizzjoni għaliex hemm goalkeepers ta’ kalibru bħal Nicky Grixti, Jake Tanti u Alan Borg Cole, naċċetta l-isfida sabiex nipprova nifforma parti minn dan it-team u nilħaq il-livell mixtieq.
Tista’ tgħaddi messaġġ lil dawk it-tfal u żgħażagħ li bħalek jixtiequ jagħmlu karriera fil-waterpolo?
Il-messaġġ li nixtieq ngħaddi liż-żgħażagħ li jixtiequ jagħmlu karriera fil-waterpolo hu biex ma jaqtgħu qalbhom qatt, anke meta l-affarijiet ma jkunux qed imorru kif tkun pjanajthom.
Tajjeb ukoll li dejjem jagħtu l-massimu tagħhom, imbagħad ir-riżultati jiġu waħedhom!
