Dalgħodu fil-Belt Valletta ttellgħat l-attività ‘Dancing with Pride’ bħala parti mill-EuroPride Valletta 2023, fejn nies ta’ kull età ngħaqdu flimkien, f’atmosfera mill-isbaħ, biex iwasslu l-messaġġ tal-ugwaljanza mill-qalb permezz taż-żfin.
Waqt li kienet qed tindirizza l-attività, is-Segretarju Parlamentari għar-Riformi u l-Ugwaljanza Rebecca Buttigieg qalet “Illum kulħadd jista’ japprezza li meta nirrispettaw lil xulxin u nħallu lil kulħadd jgħix il-libertà tiegħu jkollna soċjetà iktar b’saħħitha li tgħożż l-imħabba”.
Filwaqt li rringrazzjat lil kull min attenda u ċċelebra d-diversità, is-Segretarju Parlamentari Rebecca Buttigieg qalet li qed tħares ’il quddiem biex fil-EuroPride ta’ Settembru, Malta tiċċelebra l-kisbiet tagħha kif ukoll tikkommetti ruħha għar-riformi li għadhom iridu jitwettqu.
Preżenti mas-Segretarju Parlamentari Rebecca Buttigieg kien hemm il-President tal-Allied Rainbow Communities Maria Azzopardi u s-Sindku tal-Belt Valletta Alfred Zammit.
