Min jaf lil Anselmo Bugeja, hu konxju tad-dedikazzjoni li juri biex jgħin tfal Indjani f’Jhansi fl-Indja. Dawn it-tfal ikollhom bżonn kull tip ta’ għajnuna. Il-ħidma ta’ Anselmo ma taqta’ xejn u jagħmel minn kollox biex isibilhom familji Maltin biex jgħinuhom. Proprju fl-aħħar jiem, waqt li Anselmo jinsab f’Jhansi għaddej bil-ħidma tiegħu, huwa għadda minn esperjenza mhux tas-soltu. Esperjenza l-każ tat-tarbija abbandunata fuq il-binarji tal-ferrovija. Instabet minn ħaddiem tal-ferroviji, li ġabarha b’mod immedjat.
Fi kliem Anselmo: “x’sorpriża llum. Sibna din it-tarbija mormija l-ġmiel tagħha. Ħsilniha u ħadnieha għall-check up mediku.”
IT-TORĊA għamlet kuntatt ma’ Anselmo, li ma naqasx li jispjega dak li għadda minnu. Anselmo Buġeja hu l-fundatur ta’ Mission4Changes, organizzazzjoni tal-karità mingħajr skop ta’ qliegħ li bħalissa qed taħdem f’Jhansi, l-Indja fid-dar tat-tfal li jmexxu huma stess. Jgħidilna li “aħna qegħdin tliet voluntiera – tnejn minnhom ta’ nazzjonalità Maltija. Ilna mseħbin mad-dar St Jude Foundling home li tinsab f’Jhansi l-Indja, mis-sena 2016. Dan l-orfanatrofju jilqa’ tfal abbandunati. Dan l-orfanatrofju nbeda mis-sorijiet Maltin fis-sena 1956 u jinsab fiċ-ċentru ta’ Missjoni antika ħafna.” Din il-missjoni teħodna lura fl-1929 meta l-Kapuċċin Malti Francis Xavier Fenech kien waqqaf l-ewwel parroċċa f’Jhansi u mbagħad saħansitra għamluh l-ewwel isqof ta’ Jhansi fl-1954 – ftit snin qabel twaqqaf l-istitut mis-sorijiet Maltin ta’ l-ulied il-Qalb ta’ Ġesù.
Anselmo jkompli jgħidilna li “matul din l-aħħar żjara tagħna, tarbija nstabet abbandunata ħdejn il-binarji tal-ferrovija fl-Istazzjon taʼ Magarpur f’Jhansi fl-Indja fl-24 taʼ Frar. Ħaddiem tal-ferrovija lemaħha u immedjatament avża lill-awtoritajiet lokali. Tim ta’ Pulizija, immexxi mill-uffiċjal inkarigat wasal malajr u assigura s-sigurtà tagħha. It-tarbija ma għandha l-ebda ġrieħi viżibbli iżda kienet dgħajfa ħafna u kellha bżonn attenzjoni medika urġenti. Hija taħt osservazzjoni. It-tarbija ttieħdet immedjatament l-isptar tal-gvern lokali.”
Jenfasizza li “t-tobba eżaminaw lit-tarbija u sabuha ma tiflaħx minħabba espożizzjoni għat-trab u nuqqas ta’ kura. Fil-ħin tad-dħul fid-dar tat-tfal tagħna f’Jhansi, jum wara, hija kienet tiżen biss kilogramma. B’attenzjoni medika xierqa, inkluż idratazzjoni, nutrizzjoni, u sħana, il-kundizzjoni tagħha tjiebet, u issa qed diġa ġabret piż ta’ tliet kilogramma.
L-aħbar tal-abbandun tagħha nxterdet malajr, u nies tal-lokal mill-irħula fil-qrib, inklużi Vikash Mau u Sahu Kanak Para, qed jiġu wkoll biex jgħinu. F’ġest ta’ tama u reżiljenza, in-nies tal-lokal tawha l-isem ta’ Bhumija. Ġie identifikat ukoll sponsor wieħed minn Malta li tagħha t-tieni isem Malti – Mikelina. Wara rċerka mis-sorijiet u l-awtoritajiet lokali, l-ebda familja jew omm ma ġiet identifikata. It-tifla hija taħt il-protezzjoni tal-istat għal rijabilitazzjoni u adozzjoni futura.
Id-dar ta’ St. Jude’s Foundling f’Jhansi – li hija l-missjoni tagħna – issa saret id-dar uffiċjali ta’ Mikelina, u tipprovdilha mħabba, kura u sigurtà. Din l-istituzzjoni se tkun ommha, li tiżgura l-benessri u l-iżvilupp tat-tarbija u forsi fil-futur qrib l-adozzjoni tagħha. L-istorja tat-tifla tenfasizza l-kwistjoni tal-abbandun tat-tfal fl-Indja u l-importanza ta’ sistemi tas-sigurtà soċjali. Grazzi għar-rispons rapidu tal-ħaddiem tal-ferroviji, tal-pulizija, tal-persunal mediku, u tal-komunità, issa għandha ċans għal futur isbaħ.”
Min jista’ jibgħat xi għajnuna għall-ħalib tat-trabi u għalll-mediċina nistgħu nilqgħu donations bil-BOV mobile app fuq 99476526