Mil-lum jibdew jintlagħbu l-kwarti-finali tal-UEFA Champions League fejn kull team jinsab biċ-ċans li jikkwalifika hekk kif l-erba’ partiti huma kollha bilanċjati.
Benfica v Liverpool – Benfica jilqgħu lil Liverpool fejn jimmiraw li jwettqu “sorpriża” minħabba l-fatt li Liverpool huma fost il-favoriti li jirbħu din il-kompetizzjoni.
Peró xorta waħda jippossjiedu talenti straordinarji li jistgħu jdawru r-riżultat. Din kienet l-ewwel darba li dan it-team Portugiż wasal sa dan l-istadju bil-format il-ġdid.
Min-naħa tagħhom, din hija l-ewwel logħba għal Liverpool minn sensiela ta’ partiti diffiċli matul dan ix-xahar.
Biex waslu s’hawn Benfica għelbu lil Ajax b’aggregate ta’ 3-2 filwaqt li Liverpool għelbu lil Inter 2-1.
Huma se jkunu mingħajr l-imweġġa’ Curtis Jones filwaqt li Joel Matip huwa dubjuż.
Rodrigo Pinho u Adel Taraabt se jkunu neqsin għal Benfica filwaqt li Haris Seferovic mistenni jibda mill-bidu.
Man City v Atletico Madrid – Din hija partita delikata għaż-żewġ timijiet.
Is-Citizens jibdew bħala favoriti iżda huma se jiffaċċjaw team li elimina lil Manchester United fir-round preċedenti, b’aggregate ta’ 2-1.
Fir-round tal-Aħħar 16, it-team Ingliż għeleb lil Sporting Lisbon b’aggregate ta’ 5-0. Iżda Atletico huma team totalment differenti u għaldaqstant is-City jridu juru rispett massimu lejn l-avversarji u jridu wkoll jaddattaw sistema totalment differenti.
Guardiola ma jistax jinkludi lis-sospiż Kyle Walker filwaqt li Ruben Dias u Cole Palmer qed jirkupraw minn injury.
Il-Madrileni għandhom lil Yannick Carrasco u Hector Herrera sospiżi filwaqt li se jkunu msaħħa mir-ritorn ta’ Rodrigo De Paul u Renan Lodi.
Chelsea v Real Madrid – Real Madrid imorru Londra fejn jimmiraw li jwettqu vendetta sportiva fuq Chelsea wara li dawn tal-aħħar kienu eliminawhom fis-semi-finali fl-edizzjoni tas-sena li għaddiet u baqgħu sejrin biex rebħu l-kompetizzjoni.
Iż-żewġ timijiet kellhom riżultati mħallta fl-aħħar partita mill-kampjonat domestiku.
Filwaqt li l-Madrileni għelbu lil Celta Vigo bl-iskor ta’ 2-1 bil-goals jaslu minn penalties ta’ Karim Benzema, Chelsea ġew umiljati f’darhom minn Brentford bl-iskor ta’ 4-1.
Biex waslu mal-aħħar tmienja, Real għelbu lil Paris St Germain b’aggregate ta’ 3-2 filwaqt li Chelsea għelbu lil Lille bl-iskor ta’ 4-1.
Iż-żewġ timjiet għandhom il-players kollha għad- dispożizzjoni.
Villarreal v Bayern Munich – Villarreal jospitaw lil Bayern Munich wara li fir-round preċedenti eliminaw li Juventus b’aggregate ta’ 4-1 u għaldaqstant jinżlu għal dan il-konfront b’moral mill-aktar għoli.
Iżda huma jridu jagħrfu kif se jwaqqfu lill-attakkant perikoluż, Robert Lewandowski, li kellu sehem kbir fir-rebħa fuq RB Salzburg, b’aggregate ta’ 7-1 … meta skorja tliet goals.
Fil-veritá, Bayern jibdew bħala favoriti iżda, bla dubju, mhux se tkun passiġġata għalihom konxji mill-fatt li l-Ispanjoli ġejjin minn rebħa ta’ 3-0 għand Juventus.
Villarreal għandhom lil Alberto Moreno mweġġa’ filwaqt li l-Bavarjani għandhom lil Corentin Tolisso, Eric Choupo Moting u Alphonso Davis, indisposti, għax qed jirkupraw minn injury.
