AC Milan ingħaqdu fit-tellieqa għall-attakkant Belġjan ta’ Chelsea li jinsab barra mill-forma, Romelu Lukaku.
Il-player ta’ 28 sena ilu jbati biex isib ix-xibka b’mod regolari minn meta rritorna fi Stamford Bridge mingħand Inter għal madwar £97.5m fis-sajf li għadda, fejn irreġistra biss ħames goals biss f’21 dehra tal-Premier League sal-lum.
Wara li f’intervista fl-aħħar tas-sena li għaddiet żvela li ma kienx kuntent bis-sitwazzjoni tiegħu ma’ Chelsea, Lukaku tħabat għall-ħin tal-logħba mal-holders taċ-Champions League wkoll, li kkontribwixxa għal rapporti li l-club jista’ jfittex li jakkwista attakkant ieħor floku fis-sajf li ġej.
L-ex club tiegħu Inter kienu marbuta ħafna ma’ offerta għall-Belġjan, iżda r-rivali AC Milan issa ġew akkreditati b’interess li jġibuh lura l-Italja wkoll.
Madankollu, it-talbiet probabbli ta’ ħlas sinifikanti ta’ trasferiment minn Chelsea, kif ukoll it-talbiet tal-pagi tal-player, mistennija jkunu ta’ xkiel kbir fi kwalunkwe ftehim potenzjali f’dan l-istadju.
Madankollu, huwa mifhum ukoll li l-akkwist potenzjali tar-Rossoneri jista’ jbiddel dan, bil-kumpanija ta’ investiment ibbażata fil-Bahrain, Investcorp, bħalissa tinsab f’taħditiet biex tixtri l-club mingħand is-sidien attwali Elliott Management.
L-aħħar dehra ta’ Lukaku għal Chelsea waslet fit-telfa ta’ 4-2 tat-team tiegħu kontra Arsenal fi Stamford Bridge nhar l-Erbgħa, fejn l-attakkant beda l-logħba, iżda ġie sostitwit fis-60 minuta.
