Mill-2013 ’l hawn in-numru ta’ Għawdxin b’partajm minbarra impjieg fultajm jiżdied b’aktar minn 50%

Sa Jannar ta’ din is-sena kien hemm 2,790 Għawdxin li għandhom xogħol partajm minbarra x-xogħol fultajm. Qal dan il-Ministru għall-Finanzi u x-Xogħol Clyde Caruana meta kien qed iwieġeb mistoqsija parlamentari tad-Deputat Nazzjonalista Chris Said.

Skont l-informazzjoni mpoġġija fuq il-mejda tal-Kamra tar-Rappreżentanti, in-numru ta’ Għawdxin li barra l-impjieg fultajm kellhom ukoll impjieg partajm żdied bi kważi 53% mill-2013, meta dak iż-żmien b’kollox kien hemm 1,825 Għawdxin li kellhom xogħol partajm minbarra dak fultajm.