L-uffiċjali Pollakki u Ġermaniżi għadhom qegħdin jipprovaw jifhmu eżatt il-kawża tal-mewt ta’ ammont kbir ta’ ħut fix-xmara Oder, li tgħaddi bejn dawn iż-żewġ pajjiżi.
Dan il-każ ilu mill-aħħar tax-xahar li għadda jikkawża tħassib hekk kif regolarment qegħdin jinstabu ammonti kbar ta’ ħut metjin fuq ix-xtut ta’ din ix-xmara f’meded twal mijiet ta’ kilometri. Hu mifhum li dan qiegħed iseħħ wara li sustanza tossika sabet ruħha f’din ix-xmara, iżda s’issa għadu mhux magħruf x’inhi din is-sustanza u dan minkejja t-testijiet li saru.
Fid-dawl ta’ dan kollu, attivisti miż-żewġ pajjiżi kkritikaw lill-awtoritajiet talli qed jonqsu milli jaħdmu flimkien biex jirrispondu għal dan id-diżastru li fl-aħħar mill-aħħar huwa wkoll ta’ riskju għan-nies. B’rabta ma’ dan il-każ, nhar il-Ġimgħa li għaddiet il-Prim Ministru Pollakk Mateusz Morawiecki keċċa lil żewġ uffiċjali ambjentali minħabba l-mod mhux sodisfaċenti ta’ kif indirizzaw din il-problema.
Huwa tenna li għall-ewwel kien maħsub li din hija problema “lokali” iżda issa qiegħed isir magħruf li din hi problema fuq skala kbira ħafna tant li x-xmara trid snin biex terġa’ tirkupra.
