Favur sigurtà msaħħa għall-familji Maltin u Għawdxin, qed jitwettaq proġett li ser jara l-installazzjoni ta’ CCTV kameras f’lokalitajiet differenti li jfisser li dawn iż-żoni ser ikunu sorveljati 24 siegħa kuljum. Fosthom, f’Paceville, li mis-sajf li ġej ser ikun sorveljat permezz ta’ aktar minn 40 kamera, bil-għan li dan iservi bħala deterrent għal ċerta attività u kriminalità f’din iż-żona ta’ divertiment, filwaqt li l-Pulizija topera aktar intelligence-led policing b’azzjoni immedjata, u dan dejjem bil-għan li ċ-ċittadini jkunu dejjem aktar siguri.
Proġett li qed jara t-twettiq ta’ miżura oħra tal-Budget li b’investiment ta’ aktar minn żewġ miljun ewro ser ikun mifrux f’erba’ lokalitajiet: Paceville, San Pawl il-Baħar, il-Marsa u Raħal Ġdid b’total ta’ aktar minn 160 kamera tas-CCTV. Żoni li ntgħażlu wara analiżi minn kriminologu u l-Korp li fost oħrajn analizza każijiet ta’ kriminalità passati u ż-żoni fejn isiru. Bl-għan tal-kameras, kif anke kien ġie spjegat meta ġew introdotti għall-ewwel darba l-body cams għall-Pulizija, huwa ta’ deterrent milli titwettaq kriminalità u allura l-prevenzjoni.
Il-Ministru għall-Intern, is-Sigurtà u x-Xogħol Byron Camilleri f’konferenza tal-aħbarijiet spjega li dan il-proġett ser ikun qed jingħaqad mal-ħidma, li qiegħda tħalli riżultati pożittiva, li qegħdin iwettqu l-Pulizija. Dan hekk kif apparti l-patrols kontinwi u l-ħidma msaħħa tal-Pulizija, permezz ta’ dawn il-kameras, ser ikollhom ukoll informazzjoni real-time dwar kwalunkwe illegalità. Dan bl-għan li twassal għal azzjoni immedjata, imma aktar minn hekk għal azzjoni infurmata. Tenna wkoll li minbarra l-ħidma konġunta bejn il-LESA u l-Korp tal-Pulizija, permezz ta’ dan il-proġett ser naraw ukoll kollaborazzjoni akbar mal-Kunsilli Lokali, mal-komunità tan-negozji u mal-komunità.
“Fl-istrateġija tagħna li nżommu Malta sigura, il-prevenzjoni hija waħda mill-iktar għodod importanti. U l-prevenzjoni tiġi billi nadottaw sistemi iktar intelliġenti, billi nallokaw ir-riżorsi, iżda wkoll billi nsaħħu l-kollaborazzjoni. Proprju dan kollu qed nitkellmu dwaru llum, għaliex qed inħabbru l-implimentazzjoni ta’ proġett li jinkorpora dan kollu. Bihom inkopru l-mekka ta’ Paceville, fejn jinġabru l-iktar nies u fejn l-esperjenza u l-konsultazzjoni wrewna li proġett bħal dan għandna l-iktar bżonnu. Dan qed nagħmluh għall-ġid tas-soċjetà, ta’ min jiffrekwenta ż-żona fuq quddiem nett, iżda wkoll l-entitajiet kummerċjali. Għalhekk, dan hu punt ta’ prevenzjoni, ta’ deterrent. Li tosserva huwa importanti ħafna meta tkun qed tħaddem strateġiji ta’ intelligence led policing kif qed inħaddmu hawn.”
Il-Ministru żied jgħid li dan huwa proġett li ser jgħin lill-awtoritajiet josservaw ir-realtà u fuq dik ir-realtà jitfasslu l-azzjonijiet.
Proġett bħal dan jingħaqad ma’ inizjattivi li jaħsbu f’sistemi ta’ sigurtà proattivi u mhux reattivi, b’wieħed mill-ikbar eżempji jibqa’ x-xogħol tal-pulizija tal-komunità. It-tieni punt, fi kliem il-Ministru Byron Camilleri huwa li dan proġett li se jagħtina l-fakultà biex meta jinqala’ xi ħaġa jkollna informazzjoni diretta u immedjata. Kemm għall-investigazzjonijiet, iżda wkoll biex l-assistenza tkun tista’ tasal iktar malajr.
Ikkonkluda li dan il-proġett huwa wkoll xhieda, li dan il-Gvern ma jistrieħx fuq ir-riżultati li jikseb iżda jkompli jibni fuqhom favur il-poplu Malti u Għawdxi. Dan hekk kif Malta tpoġġiet mal-iktar għaxar pajjiżi siguri fid-dinja u dan mhux kumbinazzjoni. Bħal mhux kumbinazzjoni li r-rata ta’ kriminalità llum hi ferm inqas minn kemm kienet għoxrin sena ilu, meta dakinhar kellna inqas attività ekonomika u b’ferm inqas turisti. Hija frott il-ħidma ta’ korp tal-pulizija li investa u jibqa’ jinvesti, iżda li jaħdem ukoll id f’id ma’ entitajiet oħra u mal-komunità.
Preżenti għal din il-konferenza tal-aħbarijiet kien hemm id-Deputat Kummissarju tal-Pulizija Kenneth Haber, il-Kap Eżekuttiv tal-LESA Svetlick Flores, iċ-Chairman tat-Town Centre Management for Paceville Philip Fenech flimkien mas-Sindku ta’ San Ġiljan Guido Dalli flimkien ma’ rappreżentanti tal-Kunsill Lokali.
