Missio Malta tinsab għaddejja bl-aħħar preparamenti biex għal darb’oħra tieħu sehem fl-edizzjoni ta’ din is-sena tal-Malta Food Festival bejn id-9 u l-11 ta’ Awwissu.
“Din is-sena, Missio Malta ser tkun qed toffri esperjenza kompluta għall-pubbliku li jżur il-festival, li titfa dawl fuq il-pajjiżi sbieħ li topera fihom Missio, kif ukoll il-ħidma tagħha,” qal Robert Farrugia, Kap tal-Komunikazzjoni u Ġbir ta’ Fondi ta’ Missio Malta.
“Filwaqt li żammejna l-esperjenza VR ‘Imxi fiż-żarbun tiegħi’, li permezz tagħha il-membri tal-pubbliku jistgħu jesperjenzaw il-missjoni personalment permezz tar-realtà virtwali, ħloqna bosta inizzjattivi oħra li jagħtu esperjenza kompluta.”
Fil-fatt waqt il-Malta Food Festival, Missio Malta ser itella’ għall-ewwel darba l-International Cultural Arena fejn titmexxa diskussjoni animata dwar il-pajjiżi tal-missjoni u l-ħidma ta’ Missio
Malta mal-komunitajiet fil-bżonn. Immexxija minn Russell Sammut, id-diskussjoni ser tkopri suġġetti varji bhad-diversità, il-kultura ta’ skambju, il-ġmiel ta’ dawn il-pajjiżi differenti, u l-iktar importanti l-proġetti ta’ fejda li Missio Malta twettaq f’dawn il-pajjiżi.
Għat-tfal ser ikun hemm rokna ddedikata apposta b’informazzjoni, logħob u attrazzjonijiet apposta, dejjem b’rabta mal-ħidma ta’ Missio.
Nhar il-Ġimgħa 9 u s-Sibt 10 ta’ Awwissu, Missio Malta ser itella’ spettaklu ta’ mużika mill-aqwa talent u artisti stabbiliti lokali, bejn id-9.00 p.m. u nofs il-lejl. Nhar il-Ħadd 11 ta’ Awwissu dan jibda fis-6.00 p.m. u jisskota sa’ nofs il-lejl. Il-programm ikun immexxi minn Robert Farrugia u Angie Laus.
“Il-partiċipazzjonji ta’ Missio fil-Malta Food Festival hija okkażjoni oħra biex inkunu qrib il-pubbliku f’okkażjonijiet differenti. L-għan ta’ Missio jibqa’ li twassal il-messaġġ tagħha favur il-ġenerożità tal-Maltin biex tkun tista’ tibqa’ taħdem b’riżq komunitajiet fil-bżonn,” temm jgħid Robert Farrugia.
Il-pubbliku huwa mħeġġeġ jagħmel id-donazzjonijiet tiegħu anke mid-dar waqt li jsegwi l-ispettaklu li se jkun imxandar fuq l-istazzjonijiet kollha tat-televiżjoni. Il-Malta Food Festival ser isir fuq il-Fosos tal-Floriana bejn is-7 u l-11 ta’ Awwissu.
