Burton Azzopardi ta’ 21 sena residenti Bormla nżamm arrestat wara li ġie mixli li pprova jikkorrompi xhud li għad irid jixhed f’kawża separata.
Azzopardi kien mixli wkoll li kiser il-kundizzjonijiet tal-ħelsien mill-arrest u li sar reċediv. Dan il-każ allegatament seħħ it-Tlieta li għadda fil-Birgu.
Huwa mifhum li dan il-każ huwa relatat ma’ dak li seħħ aktar kmieni din il-ġimgħa fejn qarib tiegħu ġie mixli li pponta pistola lejn il-mekkanik tiegħu u pprova jsuq għal fuqu b’karozza wara tilwima dwar il-kwalità ta’ xogħol li kien għamillu. Dan is-sit jinsab infurmat li l-imputat allegatament avviċina lill-mekkanik u offrielu ammont konsiderovoli ta’ flus kontanti u arloġġ tad-ditta.
Quddiem il-Maġistrat Ian Farrugia, l-imputat Burton Azzopardi wieġeb mhux ħati tal-akkużi miġjuba kontra tiegħu bid-difiża titlob għall-ħelsien mill-arrest tiegħu minħabba li skontha f’dan l-istadju hemm biss allegazzjonijiet u l-fatt li hu għandu ħajja inkluż negozju u familja.
Il-Prosekuzzjoni oġġezzjonat għal din it-talba minħabba li qalet li għad hemm xhud ieħor involut li għad irid jixhed kemm f’din il-kawża u anke fil-kawża l-oħra. Għalhekk il-prosekuzzjoni qalet li teżisti l-biża’ ta’ intralċ ta’ provi.
Wara li semgħet liż-żewġ naħat, il-Qorti ċaħdet it-talba għall-ħelsien mill-arrest u ordnat li jinżamm taħt arrest preventiv fil-faċilità Korrettiva ta’ Kordin.
Il-Prosekuzzjoni tmexxiet mill-Ispettur Gabriel Kitcher. L-avukat Martin Farrugia deher għall-imputat.
