Sirjan ta’ 28 residenti Ħal Qormi nżamm arrestat wara li ġie mixli li ta fastidju sesswali lil tfajla ta’ 16-il sena.
Bashar Ibrahim Obid, li jaħdem bħala kaħħal, ġie mixli li wettaq atti ta’ natura sesswali fuq minorenni.
L-Ispettur Dorianne Tabone spjegat fil-Qorti li f’Novembru li għadda, l-allegata vittma kienet marret l-Għassa tal-Pulizija tal-Belt Valletta flimkien ma’ ommha biex tirrapporta l-każ.
It-tfajla qalet li kienet avviċinata minn raġel fil-Belt Valletta u beda jagħmlilha xi rimarki sesswali. Huwa allegatament baqa’ jsegwiha sa lift pubbliku fejn beda jmissha b’mod indiċenti u anka jpoġġilha jdejh fuq il-parti privata tiegħu.
Xi jiem wara, ir-raġel reġa’ lemaħ it-tifla viċin tar-residenza tagħha u avviċinaha għal darba oħra. Din id-darba, hija kienet fuq video call ma’ ommha u din tal-aħħar qaltlu biex lil bintu jħalliha bi kwieta.
Wara li sar rapport, ir-raġel kien identifikat u ġie arrestat.
L-imputat tressaq fil-Qorti lbieraħ fejn wieġeb mhux ħati għall-akkużi miġjuba kontrih.
F’dan l-istadju ma saritx talba għall-ħelsien mill-arrest tal-imputat u b’hekk inżamm taħt arrest preventiv fil-Faċilità Korrettiva ta’ Kordin.
Il-Prosekuzzjoni tmexxiet mill-Avukat Danika Vella mill-Uffiċċju tal-Avukat Ġenerali flimkien mal-Ispetturi Dorianne Tabone u Jeffrey Rizzo.
L-Avukat tal-Għajnuna Legali Yanika Bugeja dehret għall-imputat.
