Dennis Michael Shane ta’ 36 sena residenti Ħ’Attard, baqa’ jinżamm arrestat wara li wieġeb mhux ħati li pprova juża passaport falz biex japplika għal permess ta’ residenza f’pajjiżna.
L-Ispettur Karl Roberts akkużat lill-imputat li ffalsifika jew bidel passaport u li ta dikjarazzjoni jew tagħrif falz lill-uffiċjali tal-immigrazzjoni.
Il-Pulizija bdiet tinvestiga dan il-każ wara li kienet irċeviet rapport anonimu fejn kien allegat li l-imputat kien uża passaport Kroat falsifikat biex ikun jista’ japplika għal permess ta’ residenza f’Malta.
Wara li saru ċeru investigazzjonijiet kien inħareġ mandat ta’ arrest fil-konfront tal-imputat, iżda kien irriżulta li hu kien sifer lejn Sqallija fejn ġie arrestat hemm hekk. Hu ġie rritornat lura lejn Malta nhar il-Ġimgħa filgħaxija.
Għalkemm wieġeb mhux ħati ma saret l-ebda talba għall-ħelsien mill-arrest u għalhekk baqa’ miżmum arrestat sakemm ikompli jinstema l-każ.