Raġel ta’ 25 sena, li m’għandux saqaf fuq rasu, tressaq fil-Qorti fejn ġie mixli li weġġa’ gravi lil ħuh f’argument li seħħ il-Ħamis filgħodu.
Huwa kien ixli wkoll li hedded lill-allegat vittma u li insulentah, li għex ħajja ta’ għażż u vagabondaġġ, li wettaq reat waqt perjodu operattiv ta’ sentenza sospiża u li kien riċediv.
Huwa mifhum li l-każ kellu l-bidu tiegħu meta ż-żewġt irġiel, li kienu qegħdin jittallbu għall-flus fi Triq l-Assedju l-Kbir fil-Furjana, qabdu jiġġieldu u l-imputat allegatament ikkawża ġrieħi gravi fuq ħuh.
L-imputat baqa’ jinżamm taħt arret preventiv wara li l-Qorti semgħet kif huwa m’għandux indirizz fiss.
Il-Prosekuzzjoni tmexxiet mill-Avukat Valentina Cassar mill-Uffiċċju tal-Avukat Ġenerali flimkien mal-Ispettur Omar Zammit.
L-Avukati Mark Mifsud Cutajar u Katrna Borg Ferrando dehru għall-imputat.
