Il-kumpanija tal-farmaċewtika Moderna se tkun qed tissottometti l-vaċċin taghħa għall-approvozzjoni tar-regolatur tal-mediċini Amerikan. Dan jagħmel lil Moderna t-tieni kumpanija li tagħmel dan il-pass matul dan ix-xahar.
Moderna qalet li se tkun qed titlob lill-Amministrazzjoni Amerikana għall-Ikel u l-Mediċina għall-awtorizzazzjoni f’emerġenza wara li l-kumpanija lestiet it-test tat-tielet fażi. Minn dan it-test irriżulta li l-vaċċin ta’ Moderna huwa effettiv għal 94.1% kontra l-Covid-19.
Moderna żiedet tgħid li l-vaċċin huwa 100% efettiv fil-prevenzjoni ta’ każi severi tal-marda.
Stqarrija minn Moderna kienet tgħid li dawn ir-riżultati kienu l-istess fl-etajiet kollha, razez u ġeneru. Żiedet tgħid li ma kien hemm l-ebda tħassib serju dwar is-sigurtà tal-vaċċin, bl-aktar side effects komuni jkunu għejjam uġigħ fil-muskoli u uġigħ ta’ ras.
Għaxart ijiem ilu kumpanija oħra tal-farmaċewtika, Pfizer, applikat għall-approvazzjoni regolatorja tal-vaċċin tagħha wara li kisbet livell simili ta’ effettività.
It-testijiet ta’ Moderna kienu jinvolvu 30,000 persuna.
