Il-midfielder Amerikan Yunus Musah qed ikompli jattira l-attenzjoni ta’ diversi klabbs u wara li Inter xeħtu ħarsithom fih, issa ingħaqdu wkoll AS Monaco.
Musah hu meqjus bħala surmast f’nofs il-grawnd u matul l-istaġun li għadu kemm spiċċa kien strumentali għall-klabb tiegħu Valencia fejn ilu magħhom għal dawn l-aħħar tliet snin. Fil-fatt hu lagħab 94 partita u skorja żewġ gowls.
Musah irid lil Inter aktar milli Monaco minħabba li jqis il-futbol Taljan ferm aktar attraenti minn dak Franċiż.
Harry Winks ma’ Leicester
Harry Winks ħalla lil Sampdoria sabiex ingħaqad b’self ma’ Leicester City fl-Ingilterra. Dan il-plejer ta’ 27 sena hu proprjeta’ ta’ Tottenham Hotspur u mal-Blucerchiati lagħab 20 partita filwaqt li ma skorja l-ebda gowl.
Winks jilgħab bħala plejer ta’ nofs il-grawnd u kellu ċ-ċans jilgħab għaxar darbiet mat-tim nazzjonali Ingliż filwaqt li skorja gowl.
Leicester City se jkunu qed jilagħbu f’The Championship wara li sfaw relegati fl-istaġun li għadda.
