Owen Schembri ta’ 21 sena residenti Ħal Kirkop ġie mmultat €250 wara li nstab ħati li f’Settembru tal-2022 kien qiegħed isuq mutur mingħajr ma’ kellu liċenzja.
Fil-Qorti nstema’ kif Schembri kien involut f’inċident tat-traffiku fiż-Żurrieq. Irriżuta li l-imputat kien qiegħed isuq mutur tal-għamla Generic li kien irreġistrat fuq persuna oħra.
Uffiċjal ta’ Transport Malta kkonferma fil-Qorti li l-imputat ma kellu l-ebda kategorija ta’ liċenzja tas-sewqan Maltija.
Il-Qorti preseduta mill-Maġistrat Yana Micallef Stafrace sabet lill-imputat ħati li saq mutur mingħajr liċenzja iżda mhux ħati li saq mingħajr ma kien kopert b’polza tas-sigurtà dwar ir-riskji ta’ terzi persuni.
Mill-provi rriżulta li l-mutur kien kopert minn polza tal-assigurazzjoni, iżda ma nġiebet l-ebda prova li din il-polza ġiet annullata. Għal dawn ir-raġunijiet ma nstabx ħati ta’ din l-akkuża.
Schembri nstab ħati biss tal-ewwel imputazzjoni anke minħabba li kien hemm ammissjoni min-naħa tiegħu u kkundannatu multa ta’ €250.
Il-Prosekuzzjoni tmexxiet mill-Ispettur Charlotte Curmi.
