Meta tintlagħab id-29 ġurnata tas-Serie A, Napoli għandhom iċ-ċans li jitilgħu fl-ewwel post jekk huma jegħlbu lil Venezia hekk kif il-leaders Inter imorru jilagħbu għand Atalanta f’dik li hija meqjusa bħala partita mill-aktar diffiċli.
Atalanta v Inter – Bla dubju, din hija l-iktar partita mistennija bejn żewġ timijiet li bħalissa għaddejjin minn forma mill-aqwa.
Atalanta ġejjin minn rebħa kbira ta’ 4-0 barra minn darhom kontra Juventus biex saħħew it-tielet post fil-klassifika.
F’din ir-rebħa, Ademola Lookman, skorja l-50 goal tiegħu fil-kampjonat Taljan.
Il-Bergamaschi jibdew b’vantaġġ psikoloġiku minħabba li se jilagħbu quddiem il-partitarji tagħhom stess.
Il-pressjoni tinsab kollha fuq in-Nerazzurri u xejn għajr minn rebħa ma tissodisfa l-kriterji tagħhom, konxji mill-fatt li Napoli għandhom partita meqjusa bħala faċli għand Venezia.
Barra minn hekk, huma ġejjin minn partita “żejda” valida mill-UEFA Champions League kontra Feyenoord.
Rebħa għal Atalanta tkun tfisser li jilħqu lil Inter u jiftħu beraħ l-isfida għar-rebħ tat-titlu.
Venezia v Napoli– Napoli jmorru għand it-team li jinsab fil-post ta’ qabel l-aħħar u fil-periklu tar-relegazzjoni.
Il-Partenopei, filwaqt li jittamaw li Inter iwaqqgħu l-punti kontra Atalanta, hija prijoritá għalihom li joħorġu bit-tliet punti.
Napoli ġejjin minn rebħa ta’ 2-1 fuq Fiorentina li kienet l-ewwel waħda fl-aħħar sitt partiti … biex b’kollox fallew 11-il punt.
Għaldaqstant dan huwa l-mument biex jirritornaw għall-aqwa forma possibbli hekk kif jidher li l-isfida għar-rebħ tat-titlu se tkun waħda missielta.
Fiorentina v Juventus – Trawmatizzati mill-umiljazzjoni kontra Atalanta, Juventus immorru għand Fiorentina f’liema partita ma jistgħux ifallu minħabba li jistgħu jiġu maqbuża fir-raba’ post tal-klassifika … li jfisser il-biljett għall- UEFA Champions League.
Bl-istaġun għal kollox mitmum għall-Bianconeri, huma se jaffrontaw team li għandu bżonn il-punti biex jikkwalifika f’kompetizzjoni Ewropea … minbarra li teżisti rivalitá antika partikolari bejn dawn iż-żewġ timijiet.
Telfa għal Juventus tkun tfisser pressjoni akbar fuq il-coach, Thiago Motta, li fi tmiem l-istaġun jista’ saħansitra jitkeċċa jekk ma jintlaħaqx l-objettiv ewlieni tal-club li jikkwalifika għall-UEFA Champions League.
