“Skoprejt li kelli din is-saħħa meta kelli madwar 44 sena. Kien hemm wieħed joħroġ man-neputija tiegħi, kien jiġbed affarijiet bħalma għadni nagħmel jiena, u dak iż-żmien kont urejt l-interess. Komplejt inżid fl-interess u bdejt nagħmel bħalu. Illum il-ġurnata jien għadni sejjer u hu waqaf għax bejn xogħol u impenji oħra ma kompliex. Għalija bil-ħila tiegħu llum jien nista’ ngħin aktar persuni fil-bżonn.
Jien għalija għandi 72 sena, ma niddejjaqx ngħid li minkejja li mfarrak u mkisser għadni għaddej u s-sigriet huwa wieħed għax jien bqajt dejjem konsistenti fit-taħriġ. Jekk dak li jkun jieħu t-taħriġ b’serjetà u fl-istess waqt ma’ tabbużax mil-limiti niggarantilek jien li tixjieħ u ma tmut qatt.
Madwar sentejn ilu waqaft minħabba l-pandemija u anke kont sofrejt xi ġrieħi wara li waqajt minn sular għoli. Kont ksirt 14-il kustilja, kelli 13-il punt f’rasi u spiċċajt bil-ħadid f’dahri.
Nirringrazzja lill-Alla li tliet xhur biss wara l-inċident bdejt nitħarreġ fejn fost l-oħrajn irnexxieli nkisser il-kantun fuq l-istonku tiegħi u fuq rasi kif ukoll bdejt niġbed xi affarijiet oħra bil-mod. M’għandix kliem biex nirringrazzja pubblikament lil dawk kollha li f’dak il-perjodu diffiċli bagħtuli u wrewni s-sapport tagħhom. Bid-determinazzjoni u bl-imħabba li wrewni n-nies f’dawk il-ġimgħat sibt il-kuraġġ biex inkompli fejn ħallejt u nittama li l-bambin jagħtini s-saħħa biex inkomplu ngħinu kemm jista’ jkun lil dawk fil-bżonn.
Bħala saħħa nħossni li ġejt b’saħħti bħalma kont imma x’aktarx li qed jiġrili hu li minħabba li għandi l-ħadid f’dahri qiegħed imissli man-nerv ta’ dahri u għandi saqajja nħosshom qishom ftit imtarrxin.
Kelli f’moħħi wirja li jkun hemm karozza li tgħaddi minn fuq l-istonku tiegħi. Wirja oħra li xtaqt nagħmel kienet li nipprova nirreżisti daqqa ta’ karozza ġejja bil-15-il Kilometru ovjament għal fuq xi tip ta’ saqqu jew ilqugħ skont il-miżuri ta’ prekawzjoni li nieħdu ħsieb li jkollna meta norganizzaw dawn il-wirjiet. Ovjament issa meta nikkunsidra l-età tiegħi u dak li għaddejt minnu fl-aħħar xhur ma nistax nwettaq dawn il-wirjiet.”
