New England Revolution żvelaw li laħqu ftehim ma’ Arsenal għal Matt Turner, bil-goalkeeper se jmur jilgħab fl-Emirates Stadium fis-sajf li ġej.
Il-goalkeeper ta’ 27 sena, li rebaħ l-unur tal-Goalkeeper tas-Sena tal-MLS l-istaġun li għadda, se jingħaqad mal-Gunners f’Ġunju li ġej.
“New England Revolution qablu ma’ termini biex il-goalkeeper Matt Turner jingħaqad ma’ Arsenal fi trasferiment tas-sajf għal ħlas mhux żvelat,” qalet stqarrija mill-club tal-MLS.
“Turner, il-Goalkeeper tas-Sena tal-MLS tal-Allstate tal-2021, mistenni jingħaqad ma’ Arsenal fl-aħħar ta’ Ġunju 2022.”
Il-goalkeeper se jirrappreżenta lil New England Revolution fil-kampanja tagħhom taċ-Champions League tal-CONCACAF tal-2022 u se jkun disponibbli wkoll għal nofs l-istaġun regolari tagħhom tal-MLS.
Turner, li għamel 16-il dehra mal-Istati Uniti, għamel ukoll 106 dehra għat-team attwali tiegħu fil-kompetizzjonijiet kollha, filwaqt li żamm 23 clean sheet fil-proċess.
Aaron Ramsdale fil-mument huwa l-goalkeeper numru wieħed ta’ Arsenal, u l-wasla ta’ Turner tista’ tiftaħ il-bieb għal Bernd Leno biex iħalli l-club qabel l-istaġun 2022-23.
