Wara sentejn ta’ pandemija, iċ-ċelebrazzjonijiet tal-Imnarja reġgħu magħna fejn mill-bieraħ bdew l-attivitajiet folkloristiċi u se jkollhom il-quċċata tagħhom bl-attività ferm popolari fil-Buskett. Għal din il-festa Maltija tal-Imnarja fil-Buskett, il-Ministru għall-Agrikoltura, is-Sajd u d-Drittijiet tal-Annimali, Anton Refalo, faħħar ħidmet u l-bżulija tal-bdiewa u reġa’ tenn l-impenn tal-Gvern li se jkompli jkun ta’ spalla ghal dawk li jaqilghu l-ħobża ta’ kuljum minn dan is-settur. Settur li sfortunatament, fl-aħħar xhur, kemm minħabba l-pandemija tal-Covid-19, kif ukoll minħabba l-konflitt fl-Ukrajna, kienu diffiċli.
Il-Ministru Refalo qal li bħala Ministeru se jaraw li festi jkomplu jagħtu ħajja lill-attivitajiet u festi agrikoli li ċertament iservu ta’ vetrina għall-prodott lokali. Hawnhekk huwa stieden lill-familji u lid-dilettanti kollha biex illum imorru l-Buskett “ħalli flimkien niċċelebraw din il-festa Maltija u fl-istess ħin nuru l-gratiudni tagħna lejn dawk kollha involuti fil-qasam tal-agrikoltura”.
Filwaqt li jħossu onorat li wara nuqqas ta’ sentejn ta’ din il-festa kif nafuha issa, jista’ jiċċelebraha mal-familji Maltin u Għawdxin, huwa wiegħed li l-Gvern se jkompli jkun ta’ għajnuna għall-ħaddiema f’dan is-settur.
Il-Ministru Anton Refalo rringrazzja lill-ħaddiema kollha involuti fl-organizazzjoni tal-festa tal-Imnarja biex din setgħet terġa’ tkun immarkata fil-kalendarju kulturali ta’ din is-sena.
Attivitajiet li żgur se jolqtu l-gosti ta’ kulħadd…
Il-programm tal-lum jinkludi:
- Quddiesa fid-9.30 ta’ filgħodu fil-Katidral tal-Imdina;
- Esebizzjoni tal-annimali;
- Sezzjoni speċifika għal bhejjem indiġeni Maltin;
- Ħlib tan-nagħaġ u mogħoż bil-mod tradizzjonali;
- Dimostrazzjoni kif tqarwis tan-nagħaġ u kif issir il-ġbejna Maltija;
- Esebizzjoni u kompetizzjoni tal-frott u l-ħaxix;
- Wirjiet ta’ snajja’ tradizzjonali;
- Logħob tradizzjonali Malti għat-tfal;
- Mużika tradizzjonali;
- Gwidi lejn il-Palazz tal-Verdala b’parata uu esebizzjoni ta’ makkinarju antik;
- Taħditiet informattivi dwar suġġetti varji inkluż dwar folkor u agrikoltura fil-Palazz tal-Verdala;
- Esebizzjonijiet b’informazzjoni;
- Ikel u ħelu tradizzjonali;
- Preżentazzjoni tal-premjijiet tal-kompetizzjonijiet kollha mill-President ta’ Malta.
